ԱՄՆ-ում ստեղծված սկանդալային «Մուսուլմանների անմեղությունը» ֆիլմի դեմ ցույցերը մինչ օրս շարունակվում են մուսուլմանական երկրներում: Դրանք տեղափոխվել են նաև այն երկրներ, որտեղ կան մուսուլմանական մեծաթիվ համայնքներ, մասնավորապես՝ Ավստրալիա, Բելգիա, Ֆրանսիա ու Մեծ Բրիտանիա:
Մինչ ԱՄՆ-ն ուժեղացնում է իր դիվանագիտական ներկայացուցչությունների անվտանգությունը այն երկրներում, որտեղ ենթարկվել է հարձակման, իսկ մի շարք արևելյան երկրներ արգելափակում են հասանելիությունը ֆիլմին, Google ընկերությունը մերժում է վիդեոհոսթինգից հեռացնել «Մուսուլմանների անմեղությունը» ֆիլմը: Փորձագետները ենթադրում են, որ անկարգությունները կշարունակվեն, քանի որ ֆիլմը միայն առիթ էր ելույթների համար ու ոչ թե սկզբնապատճառ:
Այն երկրներում, որտեղ հայտնվել են տեղեկություններ առաջին զոհվածների մասին, անկարգությունները մինչ օրս շարունակվում են: Այսպես՝ նոր տեղեկություններ են ստացվում Պակիստանում, Աֆղանստանում, Ինդոնեզիայում ցուցարարների ու ոստիկանության միջև բախումների մասին: Այս մասին հայտնում է RIA Nosvosti-ն:
Մինչ այդ, Լիբիայում ու Եգիպտոսում շարունակվում են կալանքները: Լիբիայում, օրինակ, կալանավորել է նվազագույնը 50 մարդ Բենղազիում ԱՄՆ դեսպանատան վրա հարձակման կասկածանքով, Եգիպտոսում՝ 110 մարդ:
Մուսուլմանական երկրներում բողոքի ակցիաները արդեն անհանգստություն են առաջացրել ԱՄՆ-ում ու Կանադայում, որն անցած շաբաթ որոշում էր կայացրել փակել դեսպանատները Եգիպտոսում, Լիբիայում ու Սուդանում՝ վախենալով դիվանագիտական ներկայացուցչության անդամների կյանքի անվտանգության համար: Իր հերթին, ԱՄՆ պետդեպը կոչ է արել Թունիսում ու Սուդանում դիվանագիտական ներկայացուցչության աշխատակիցներին վերադառնալ ԱՄՆ՝ անվտանգության նկատառումներից ելնելով:
ԱՄՆ նախագահ Բարաք Օբաման հրամայել է ուժեղացնել ԱՄՆ դեսպանությունների անվտանգության միջոցառումները:
ՄԱԿ-ի խորհուրդն ու Եվրամիությունը ավելի վաղ հանդես էին եկել մի շարք մուսուլմանական երկրներում արտասահմանյան դիվանագիտական ներկայացուցչության վրա հարձակումները դատապարտող հայտարարությամբ ու պահանջել էին այդ երկրների կառավարությունից ապահովել դիվանագիտական ներկայացուցչությունների անվտանգությունը:
Անցած շաբաթ ցույցերը տեղափոխվեցին նաև Ավստրալիա, Բելգիա, Մեծ Բրիտանիա ու այլ երկրներ:
Ավստրալիական Սիդնեյում ոստիկանների հետ բախումների հետևանքով տուժել է 6 ոստիկան և 17 ցուցարար: Լոնդոնում ԱՄՆ դեսպանատան մոտ ցույցերին մասնակցել է մոտ 300 մարդ, ցույցն անցել է առանց արտակարգ միջադեպերի: Ֆրանսիայում ևս բողոքի ակցիան, որին մասնակցել է շուրջ 250 մարդ, առանց միջադեպերի է անցել: Քանի որ ցույցը չէր համաձայնեցվել իշխանությունների հետ, ոստիկանությունը ցրել է այն ու կալանավորել 150 մարդու, սակայն փաստաթղթերը ստուգելուց հետո բոլորին ազատել է:
