Ժամանակը ցույց կտա, թե նախագահի մասնակցությամբ խորհրդակցությունը PR շոո՞ւ էր, թե՞ տեղաշարժեր կգրանցվեն: Այսօր «Առաջին լրատվական»-ի հետ զրույցում այս մասին ասաց ԲՀԿ խմբակցության պատգամավոր Վահան Բաբայանը՝ անդրադառնալով շաբաթ օրը ՀՀ նախագահ Սերժ Սարգսյանի` կառավարությունում հրավիրած խորհրդակցությանը:
Վահան Բաբայանը հիշեցրեց, որ ԲՀԿ-ն դեռևս կառավարության ծրագրի քննարկման ժամանակ էր դեմ քվեարկել ՀՀ կառավարության ծրագրին, բազմաթիվ անգամ չէր թաքցրել դժգոհությունը գործող կառավարության սոցիալ-տնտեսական ծրագրից և վարած քաղաքականությունից:
«Նախագահի մասնակցությամբ խորհրդակցությունը PR շոո՞ւ էր, թե՞ իրականում ինչ-որ տեղաշարժեր կգրանցվեն` ցույց կտա ժամանակը»,- հստակեցրեց պատգամավորը՝ չցանկանալով կանխավ ենթադրություններ անել:
Հիշեցնենք, որ շաբաթ օրը տեղի ունեցած խորհրդակցության ժամանակ ՀՀ նախագահ Սերժ Սարգսյանը խստորեն քննադատեց ՀՀ կառավարության և խորհրդակցությանը ներկա մի շարք նախարարների աշխատանքը:
