Վրացական «Կվիրիս պալիտրա» թերթի փոխանցմամբ՝ Լոնդոնում տեղի ունեցած Օլիմպիական խաղերում մեդալներ նվաճած վրացի մարզիկները դեռ չեն ստացել խոստացված պարգևավճարները: Ավելին, թերթի տվյալներով՝ դեռ անհայտ է, թե որքան է ստանալու Վրաստանի միակ ոսկե մեդալակիր, ձյուդոիստ Լաշա Շավդատուաշվիլին: Բացի այդ, վրացի մարզիկները նվաճել էին նաև երեքական արծաթե և բրոնզե մեդալներ:
Արծաթե մեդալ վաստակելու համար վրացի մարզիկներին խոստացել են 250,000 լարի (150,000 դոլար), իսկ բրոնզե մեդալի համար՝ 100,000 լարի (60,000 դոլար): Վրաստանի սպորտի և երիտասարդության նախարարությունը հաստատել է մարզիկներին պարգևավճարի հատկացման ձգձգումը՝ դա պատճաաբանելով նրանով, որ այդ գումարը հատկացվել է Կախեթում բնական աղետից տուժածներին:
Դրա հետ մեկտեղ, նախարարությունում խոստացել են մարզիկներին պարգևատրել հոկտեմբերի 1-ին կայանալիք խորհրդարանական ընտրություններից հետո: Վրացական թերթը, սակայն, հիշեցնում է, որ ընդդիմադիր միլիարդատեր Բիձինա Իվանիշվիլին 80 միլիոն լարի (48 միլիոն դոլար) էր հատկացրել Կախեթին, ինչը պետք է, որ բավական լիներ տեղի բնակիչներին:
Նշվում է, որ Պեկինում ոսկե մեդալ նվաճած վրացի երեք մարզիկներին նախագահական հիմնադրամից առանձին հատկացվել է մեկական միլիոն լարի (600,000 դոլար):
