Այսօր Երևանի պետական համալսարանը հյուրընկալել էր Հայաստանում ԱՄՆ դեսպան Մարի Յովանովիչին, որը ելույթ ունեցավ «Քաղաքացիական հասարակությունը Հայաստանում» թեմայով:
Յովանովիչն ընդգծեց, որ ցանկացած պետության թիվ մեկ գերակայությունն իր քաղաքացիների անվտանգության ապահովումն է, իսկ կառավարությանը քաղաքացիական հասարակությունն անհրաժեշտ է, որ հանդես գա որպես քննադատ, գործընկեր և պահանջներ ներկայացնող:
«Այն կառավարությունները, որոնք փորձում են նորմավորել տեղեկատվությունը կամ խեղդել քննադատությունը միայն և միայն վնաս են հասցնում իրենց լեգիտիմությանը և խարխլում են տնտեսությունը բարեփոխելու, կոռուպցիայի դեմ պայքարելու, ներդրումներ ներգրավելու, աշխատատեղեր ստեղծելու, ազատ ընտրություններ անցկացնելու ու հարևաննների հետ հարաբերությունները տնօրինելու իրենց հնարավորությունները»,- հայտարարեց Յովանովիչը:
Յովանովիչը նշեց, որ քաղաքացիական հասարակության կայացման համար անհրաժեշտ է բոլորի համար օրենքը հետևողական և հավասար կիրառել, ԶԼՄ-ները զերծ պահել քաղաքական ճնշումներից, որպեսզի եթերը հասանելի լինի տարբեր գաղափարների և կարծիքների համար, պատասխանատվության ենթարկել բոլորին, ովքեր հարձակումներ են գործում լրագրողների դեմ:
«Անհրաժեշտ է, որ Հայաստանի կառավարությունը, Հանրային հեռուստաընկերությունը, Կենտրոնական ընտրական հանձնաժողովը, ոստիկանությունը, քաղաքական կուսակցությունները ապահովեն
առաջիկա ընտրությունների համապատասխանությունը ոչ միայն միջազգային ստանդարտներին, այլ նաև Հայաստանի ժողովրդի պահանջներին ու ակնկալիքներին»,- ընդգծեց Հայաստանում ԱՄՆ դեսպանը:
