Ռամիլ Սաֆարովին ազատ արձակելուց հետո ստեղծված իրավիճակի առնչությամբ մի շարք ԶԼՄ-ներ տեղեկացնում են, որ Ադրբեջանի բարձրագույն ղեկավարության շրջանում հակասություններ են առաջացել:
Մասնավորապես, ինչպես հաղորդում է ուկրաինական Fraza.ua-ն, Սաֆարովին ներում շնորհելու դեմ հանդես եկեղ և իշխող խմբին նման քայլի հնարավոր բացասական հետևանքների մասին զգուշացնող Ադրբեջանի ԱԳՆ նախարար Էլմար Մամեդյարովի և նախագահ Իլհամ Ալիևի միջև հակասություններ են առաջացել:
Հարկ է նշել, որ Մոսկվայում փորձագետները, որոնք ծանոթ են Ադրբեջանում ուժերի տեղաբաշմանը, ИА REGNUM-ի հետ զրույցում հաղորդել են, որ Մամեդյարովը, այսպես կոչված, «խաղաղության կուսակցության» անդամ է, որը հանդես է գալիս Լեռնային Ղարաբաղի հակամարտության ռազմական ճանապարհով լուծման դեմ: Նույն փորձագետների գնահատմամբ` «պատերազմի կուսակցության» անդամ է Ադրբեջանի պաշտպանության նախարար Սաֆար Աբիևը:
«Ինչ վերաբերում է Ադրբեջանի նախագահ Իլհամ Ալիևին, ապա նա այդ երկու բևեռների գերագույն իրավարարն է, որն ընդունում է վերջնական որոշումը: Ռամիլ Սաֆարովի ազատ արձակման դեպքում, ակնհայտ է, հաղթել է «պատերազմի կուսակցությունը»,- հաղորդել է ռուս փորձագետը, ով չի ցանկացել ներկայանալ:
Fraza.ua-ն շարունակելով` գրում է. «Նշենք, որ սա առաջին դեպքը չէ, երբ Իլհամ Ալիևի և Էլմար Մամդյարովի միջև տարաձայնություններ են առաջացել: Մեկ անգամ չէ, որ վերլուծաբանները նկատել են, թե ինչպես է ադրբեջանական պետության ղեկավարը հանդես գալիս ռազմական բյուջեի ընդլայնման և Ղարաբաղյան հակամարտությունը ռազմական ճանապարհով լուծելու մասին հայտարարությամբ, իսկ մի քանի օր անց ԱԳ նախարարը խոսել է հակամարտության խաղաղ կարգավորման մասին:
Ինչպես նաև Ադրբեջանի ԱԳՆ մեկնաբանություններն այն մասին, որ Ադբեջանը թշնամական վերաբերմունք չունի հայերի հանդեպ, հակասում է Իլհամ Ալիևի թեզիսին այն մասին, որ ամբողջ աշխարհի հայությունը Ադրբեջանի «թիվ մեկ թշնամին է»:
