Իսրայելի վարչապետ Բենիամին Նեթանյահուն ամերիկյան NBC հեռուստաալիքին տված հարցազրույցում հայտարարել է, որ առաջիկա 6-7 ամսում Իրանը շատ մոտ կլինի ատոմային զենքի ստեղծման հնարավորությանը:
Նա ավելացրել է, որ 2013 թ. կեսերին Իրանը 90%-ով մոտ կլինի այն փուլին, որպեսզի սկսի հարստացնել ուրանը ատոմային զենքի ստեծման նպատակով օգտագործելու համար: Ապա Նեթանյահուն դիմել է Միացյալ Նահանգների նախագահին` դա կանխելու հարցում աջակացություն ցուցաբերելու դիմումով:
«Իրանը կառավարում է տարօրինակ ֆանատիզմով տառապող մի առաջնորդ, նույն այն ֆանատիզմը, որն այսօր առկա է նաև օտարերկրյա դեսպանատների վրա հարձակվող մարդկանց մեջ: Եվ դուք ուզում եք, որ այդ մարդկանց ձեռքին լինի ատոմային զե՞նք»,- նշել է Իսրայելի վարչապետը:
Իսրայելցի քաղաքական գործիչը նաև չի համաձայնել այն մտքին, թե Իրանի ատոմային զենքը տարածաշրջանում կայություն կհաստատի: «Այսպիսի մոտեցումը մարդկային հիմարության նոր չափորոշիչ է»,- նշել է վարչապետը:
