«Ժողովուրդ» թերթն օրեր առաջ գրել էր, որ Գագիկ Ծառուկյանը Մոսկվայում շքեղ առանձնատուն է կառուցում: Այդ տեղեկության համար դիմելով Ծառուկյանի խոսնակին՝ թերթը ստացել է Հայաստանի համար չափազանց բնորոշ պատասխան՝ ինչ-որ տեղեկությունները չեն մեկնաբանում: Հայաստանի իշխանության կամ, այսպես ասած, էլիտայի ներկայացուցիչները այդ մարտավարությունը շատ լավ են որդեգրել: Երբ նրանց տրվում է որևէ տհաճ, անցանկալի, այսպես ասած՝ աղմկոտ հարց, նրանք հրաժարվում են այն մեկնաբանելուց՝ ձևացնելով, թե իբր ասվածը անհեթեթություն կամ «հեթեթություն» է:
Օրինակ՝ Վերահսկիչ պալատի նախագահ Իշխան Զաքարյանին էլ իր տան մասին են հարցնում՝ ստանում են նույն պատասխանը, որ շահարկել պետք չէ: Նրան կոնկրետ հարց են տալիս, այն էլ՝ պատգամավորն է տալիս, իսկ նա, կոնկրետ հարցին պատասխանելու փոխարեն, հայտարարում է, թե պետք չէ շահարկել: Դե, Իշխան Զաքարյանը, մինչև ՎՊ նախագահ դառնալը, Գագիկ Ծառուկյանի աջ թևն էր «Բարգավաճ Հայաստան» կուսակցությունում, և զարմանալի չէ, որ Ծառուկյանից սովորել է, թե ինչպես պետք է լղոզել անցանկալի հարցերը, աղմկոտ հարցադրումները:
Ներկայումս Գագիկ Ծառուկյանի և Իշխան Զաքարյանի ջրերը մի առվով չեն հոսում, որովհետև Զաքարյանը ժամանակի ընթացքում ավելի հուսալի «բիզնես-ծրագիր» դիտեց Սերժ Սարգսյանին: Ժամանակը ցույց կտա, իհարկե, թե ով է ավելի իրավացի, և ում «տունն» է ավելի ամուր լինելու՝ Իշխան Զաքարյանի՞, թե՞ Գագիկ Ծառուկյանի նորակառույցը: Իհարկե, նրանց տները տարբեր տեղերում են, և ամրության չափումն, իհարկե, հարաբերական է: Օրինակ՝ եթե խոսքը Հայաստանում կառուցվող տների մասին է, ապա «բուքմեյքերները» ոնց որ թե ավելի բարձր են գնահատում Իշխան Զաքարյանի շանսերը, և այս պատճառով է, կարծես թե, Ծառուկյանն իր համար տուն կառուցում արտերկրում և այն էլ՝ Մոսկվայում:
Հետաքրքիր է, որ Մինսկում չի կառուցվում տունը, որտեղ Ծառուկյանը կոնյակի գործարան էր կառուցում: Սակայն հետաքրքիր է, որ կամաց-կամաց Հայաստանից արտահանելով իր կապիտալը՝ գործարաններ ու հյուրանոցներ գնելով տարբեր երկրներում, Գագիկ Ծառուկյանն այժմ էլ տուն է կառուցում արտերկրում: Սովորաբար նման բան անում են այն դեպքում, երբ պատրաստվում են մեկնել երկարատև բնակության, եթե ոչ՝ մշտական: Չի բացառվում, որ Ծառուկյանը Մոսկվայում տուն կառուցելու այդ որոշումը կայացրել է բուքմեյքերների հետ խորհրդակցությունից հետո:
