Հելսինկյան ասոցիացիայի «Մարդու իրավունքների վիճակը Հայաստանում» 2010 թվականի զեկույցում ընդգրկված են ՀՀ քրեակատարողական հիմնարկներում, հոգեբուժարաններում, դատարաններում 2009-2010 թվականներին իրականացված մոնիտորինգի արդյունքները:
Զեկույցը անդրադարձ է կատարել նաև Հայաստանում խոսքի ազատությանը, խաղաղ հավաքներին, խոշտանգմանը և վատ վերաբերմունքին: Հելսինկյան ասոցիացիայի փորձագետ Արսեն Բաբայանը, ներկայացնելով Հայաստանի ՔԿՀ-ների վիճակը, նշեց, որ այնտեղ խայտառակ հակասանիտարական պայմաններ են, կարելի է ասել, որ միակ նորմալ հիմնարկը Արթիկի ՔԿՀ-ն է,իսկ ամենավատ վիճակում է «Նուբարաշեն» ՔԿՀ-ն: «Նուբարաշեն» քրեակատարողական հիմնարկում 20-ից ավելի կալանավոր կա։ Մարդիկ հերթով են քնում, չափազանց լուրջ է ջրի խնդիրը` ջուրը ժամով են տալիս, ընդ որում, ադմինիստրատիվ մասում ջուր կա, իսկ մասնաշենքում չկա»,- ասաց Ա. Բաբայանը:
Նա նշեց նաև, որ 2010 թվից մինչև 2011 թվականի փետրվարի 9-ը ընկած ժամանակահատվածում հայաստանյան ՔԿՀ-ներում արձանագրվել է մահվան 38 դեպք, որից 32-ը՝ հիվանդության պատճառով, 1-ը՝ դժբախտ պատահար և 5-ը՝ ինքնասպանություն: