Լոս Անջելեսում ավարտվեց «Օսկարի» 83-րդ մրցանակաբաշխությունը: Ինչպես նշում են մասնագետները, այս տարի ներկայացված էին բավականին հետաքրքիր աշխատանքներ, և ընտրությունն անշուշտ դժվար էր:
«Լավագույն ֆիլմ» անվանակարգում մրցանակը բաժին հասավ ռեժիսոր Թոմ Հուփերի «Թագավորի խոսքը» ֆիլմին: Այս անվանակարգում, ի տարբերություն նախորդ տարիների, ներկայացված է եղել ոչ թե 5, այլ միանգամից 10 ֆիլմ: «Օսկարի» համար պայքարում էին նաև «Սև կարապ», «Մարտիկը», «Երեխաների հետ ամեն ինչ կարգին է», «127 ժամ», «Խաղալիքների պատմություն – 3», «Ամուր կառչում», «Ձմռան ոսկոր», «Սկիզբը» և «Սոցիալական ցանց» ֆիլմերը:
Հաղթող ֆիլմի ռեժիսորը` Թոմ Հուփերը, առանց մրցանակ չհեռացավ` ստանալով «Օսկար» «Լավագույն ռեժիսոր» անվանակարգում:
Թոմ Հուփերի ֆիլմն, անշուշտ, ամենահաջողակն էր այս տարի: Այն մրցանակի արժանացավ նաև «Լավագույն դերասան» անվանակարգում. ինչպես և սպասվում էր, մրցանակը բաժին հասավ «Թագավորը խոսում է» ֆիլմում գլխավոր դերի լավագույն մարմնավորող Քոլին Ֆերթին: Այս անվանակարգում ներկայացված էին նաև Խավիեր Բարդեմը («Գեղեցիկը»), Ջեֆ Բրիջեսը («Ամուր կառչում»), Ջեսի Այզենբերգը («Սոցիալական ցանց»), Ջեյմս Ֆրանկոն («127 ժամ»):
«Լավագույն դերասանուհի» անվանակարգում հաղթեց Նատալի Պորտմանը «Սև կարապը» ֆիլմում գլխավոր դերի համար: Այս անվանակարգում ներկայացված էին նաև Նիքոլ Քիդմանը («Ճագարի բույնը»), Անեթ Բենինգը («Երեխաների հետ ամեն ինչ կարգին է»), Ջենիֆեր Լոուրենսը («Ձմեռան ոսկոր»), Միշել Ուիլյամսը («Երկնագույն Վալենտին»):
«Երկրորդ պլանի լավագույն դերասան» անվանակարգում հաղթել է Քրիստիան Բեյլը («Մարտիկը»), իսկ «Երկրորդ պլանի լավագույն դերասանուհի» է դարձել Մելիսա Լեոն՝ նույնպես «Մարտիկը» ֆիլմից:
