Թուրքական Hürriyet թերթի փոխանցմամբ՝ ընդդիմադիր պատգամավոր, «Ժողովրդա-հանրապետական» կուսակցության (ԺՀԿ) ներկայացուցիչ Մեհմեթ Քեսիմօղլուն հոլիվուդյան դերասանուհի, ՄԱԿ-ի բարի կամքի դեսպան Անջելինա Ջոլիին մեղադրել է ամերիկյան Կենտրոնական հետախուզական վարչության (ԿՀՎ) գործակալ լինելու մեջ:
Ջոլին Թուրքիա է ժամանել երեկ և ՄԱԿ-ի փախստականների հարցերով գործակալության ղեկավար Անտոնիո Գուտերեշի հետ այցելել է Գազիայնթեփում ու Քիլիսում գտնվող սիրիացի փախստականների վրանային ճամբարներ: Այսօր էլ Ջոլին դռնփակ հանդիպում է ունեցել Թուրքիայի ներքին գործերի նախարար Իդրիս Նաիմ Շահինի հետ:
Հենց դա էլ ընդդիմադիր պատգամավորին դրդել է խորհրդարանի օրակարգ մտցնել այն, որ Անջելինա Ջոլին ԿՀՎ գործակալ է՝ զարմանք հայտնելով, թե ինչո՞ւ է այդ հանդիպումն անցկացվել դռնփակ պայմաններում: Նա հայտարարել է՝ 2002 թվականից (Էրդողանի կուսակցության իշխանության գալուց) հետո ՄԱԿ-ի քանի՞ հատուկ ներկայացուցչի են այդպես ընդունել:
Հիշեցնելով, որ վերջին շրջանում Թուրքիա են այցելել ԱՄՆ պետքարտուղար Հիլարի Քլինթոնն ու ԿՀՎ ղեկավար Դևիդ Պետրեուսը՝ Քեսիմօղլուն հայտարարել է, որ Անջելինա Ջոլին ԿՀՎ գործակալ է և օգտագործվում է ԿՀՎ-ի պատերազմական քաղաքականության վերաբերյալ հասարակական կարծիքի վրա համապատասխան ազդեցության համար:
