Ճապոնիան հայտարարել է մինչև 2040 թվականը գոյություն ունեցող բոլոր ատոմային էլեկտրակայանները փակելու և նշված ժամկետում ատոմային էներգիայի սպառումը զրոյականացնելու ծրագրերի մասին: Այս մասին հաղորդում է Agence France-Presse-ը: Այսպիսով՝ Ճապոնիան հետևում է Իտալիայի, Շվեյցարիայի և Գերմանիայի օրինակին, որոնք ավելի վաղ էին հրաժարվել «խաղաղ ատոմից»:
Նման որոշման հիմքում հասարակության ճնշումն է: Բնակչությունը պահանջում է փակել ատոմակայանները՝ հաշվի առնելով 2011-ի մարտին տեղի ունեցած «Ֆուկուսիմա-1» ատոմակայանի վթարը:
Տոկիոյի նոր էներգետիկ քաղաքականությունը նախատեսում է 40 տարուց ավելի գոյություն ունեցող ռեակտորների փակում, նոր ռեակտորների կառուցման կասեցում: Աշխատանքը վերսկսած ռեակտորները կաշխատեն միայն նոր` ավելի կոշտ չափանիշներով թեստ անցնելուց հետո:
Ճապոնիայում երկրաշարժի հետևանքով «Ֆուկուսիմա-1» ատոմակայանի վթարից հետո երկրում գործող բոլոր ռեակտորները կանգնեցվեցին: Դրանից հետո վերագործարկվել են միայն երկուսը: Ոլորտի կրած վնասի ընդհանուր չափը կազմում է 46 մլրդ դոլար:
Ատոմային էներգիան մինչև 2011 թվականը բավարարում էր երկրի էներգիայի պահանջարկի ավելի քան 1/3-ը: Ներկայում Ճապոնիան ստիպված է ավելի շատ նավթ գնել Պարսից ծոցի երկրներից՝ պակասը լրացնելու համար:
Ավելի վաղ Գերմանիան հայտարարել էր, որ մինչև 2022 թվականը կդադարեցնի 17 ռեակտորների աշխատանքը: Շվեյցարիան ատոմակայաններից կհրաժարվի 2034 թվականին: Միևնույն ժամանակ, ասիական երկրները ձգտում են ընդլայնել ատոմային էներգետիկայի իրենց ծրագրերը: Առաջին հերթին՝ դա վերաբերում է Հնդկաստանին և Չինաստանին:
