ԼՂՀ ԱԺ պատգամավոր, ընդդիմադիր Վիտալի Բալասանյանի ստեղծած նոր ուժը «Սահմանադրական Արցախ» քաղաքացիական շարժումն է: Արցախի նախագահական ընտրություններում պարտություն կրած Վիտալի Բալասանյանը վերջին ժամանակահատվածում բարձրաձայնում էր այն մասին, որ նոր ընդդիմադիր ուժ է ստեղծելու, որը փորձելու է լուծել Արցախի առջև ծառացած խնդիրները և այլընտրանք լինել գործող իշխանություններին: Սեպտեմբերի 9-ին Արցախի Շուշի քաղաքում արդեն տեղի է ունեցել «Սահմանադրական Արցախ» նախաձեռնող խմբի ժողովը: Նոր քաղաքացիական շարժման նախաձեռնողների թվում են Վիտալի Բալասանյանը, ԼՂՀ արտաքին քաղաքականության և անվտանգության հանրային խորհրդի նախագահ Մասիս Մայիլյանը, Ստեփանակերտի մամուլի ակումբի նախագահ Գեղամ Բաղդասարյանը, ԼՂՀ ԱԺ նախկին պատգամավոր Գրիգորի Հայրապետյանը և ԼՂՀ ԱԺ պատգամավոր Վահան Բադասյանը:
«Առաջին լրատվական»-ը մի քանի հարց ուղղեց նախաձեռնության ղեկավար Վիտալի Բալասանյանին:
– Պարոն Բալասանյան, ինչո՞ւ քաղաքացիական նախաձեռնություն և ոչ թե կուսակցություն:
– Կուսակցություններ շատ կան և՛ Հայաստանում, և՛ Արցախում, կուսակցությունն այսօր հրատապ չէ: Քաղաքացիական շարժում ենք ստեղծել: Սա լավ գաղափար է, կան նպատակներ: Տեղ ենք թողել, որ մասնակցեն թե՛ կուսակցությունները, թե՛ հասարակական կազմակերպությունները, թե՛ անհատները: Այսինքն` ազատ դաշտ ենք ստեղծել: Նրանք, ովքեր համամիտ են մեր հետ՝ օգնելու, աջակցելու դուրս գալ այս վիճակից, խնդրեմ, մենք կընդունենք:
– Կարելի՞ է ենթադրել, որ քաղաքացիական նախաձեռնություն ստեղծելով՝ որոշ չափով հեռանում եք քաղաքական դաշտից:
– Ո՛չ, դա քաղաքական դաշտից դուրս չէ: Ցանկացած երկրում կա քաղաքացիական շարժում, և այդ շարժմանը մասնակցում են թե՛ հասարակական կազմակերպությունները, թե՛ քաղաքական ուժերը: Էդ շարժումը թե Հայաստանում է եղել ժամանակին, թե Ղարաբաղում: Երբ որ Ղարաբաղում ու Հայաստանում շարժում ենք սկսել, հո կուսակցությունով չենք սկսել: Բայց եղել է հստակ նպատակ, չէ՞: Մեր համար օրախնդիր չի իշխանություն ունենալ: Մեր համար օրախնդիր է, որպեսզի Ղարաբաղի հարցին լուծում տրվի, որպեսզի Ղարաբաղը շատ շուտ ճանաչվի, որպեսզի Ղարաբաղում գործի օրենք, օրենքը բոլորի համար հավասար լինի, որպեսզի ընտրություններն անցնեն արդար: Դրա համար էլ անունը դրել ենք «Սահմանադրական Արցախ», այսինքն՝ օրենքի գերակայություն:
– «Սահմանադրական Արցախ» ասելով՝ նկատի ունեք, որ օրենքի գերակայությո՞ւն լինի ԼՂՀ-ում:
– Այո՛, հենց դրա համար էլ անունը դրել ենք «Սահմանադրական Արցախ»: Այսինքն՝ Սահմանադրությունը չպիտի խախտենք: Իսկ ըստ Սահմանադրության՝ իշխանությունը պատկանում է ժողովրդին: Մինչ այս, խախտվել է Սահմանադրությունը: Մեր մտահոգությունն էլ դա է, ուզում ենք թույլ չտանք, որ օրենքները խախտվեն:
– Իսկ արդեն արձագանքներ կա՞ն՝ ձեր շարժմանը միանալու համար:
– Արդեն ահագին թվով մարդիկ մեզ դիմել են: Մենք սկսելու ենք անդամագրման գործընթացը:
– Պարոն Բալասանյան, այսինքն՝ համոզված եք, որ քաղաքացիական շարժման միջոցով ավելի շուտ կհասնեք Ձեր նպատակներին, քան կուսակցություն ստեղծելու դեպքո՞ւմ:
– Համոզված եմ, որ ավելի շատ աշխատանքներ կարող ենք այդ շարժմամբ անել, ավելի շատ մարդ կընդգրկվի մեր շարքերում, քան եթե ունենանք կուսակցություն: