Թուրքիայում լրագրողներին դատում են ինչպես պետական հանցագործների: Այս մասին հաղորդում է Kommersant-ը:
Ստամբուլում ընթանում է Թուրքիայի պատմության մեջ լրագրողների դեմ ամենաաղմկահարույց գործընթացը: Ամբաստանյալների աթոռին 44 մարդ է, որոնց մեծամասնությունն արդեն 9 ամիս է` կալանքի տակ է: Լրագրողներին մեղադրում են արգելված Քրդստանի աշխատավորական կուսակցությանն աջակցելու, քայքայիչ քարոզչության և պետությանը վարկաբեկելու մեջ: Մեղադրյալների փաստաբանները պնդում են, որ իրենց պաշտպանյալները կատարել են մասնագիտական պարտականությունները:
Գործնականում բոլոր ամբաստանյալ լրագրողները քրդեր են, որոնց մեղադրում են Քրդական աշխատավորական կուսակցության հետ կապերի մեջ: Կուսակցությունն Անկարան համարում է ահաբեկչական: Սակայն փաստաբանները, ուսումնասիրելով 800 էջանոց մեղադրական փաստաթուղթը, հայտնաբերել են բազմաթիվ դրվագներ, որոնք կապ չունեն ո՛չ ահաբեկչության, ո՛չ էլ քրդական անջատողականության հետ:
Այսպիսով՝ լրագրողներից մեկը մեղադրվում է «պետության խտրականության» մեջ այն բանի համար, որ պատմել է Turkish Airlines ազգային խոշոր ավիաընկերությունում սեռական ոտնձգությունների դեպքերի մասին:
«Հանցագործներից» մեկն էլ հարցազրույց է վերցրել «Խաղաղություն և ժողովրդավարություն» քրդական կուսակցության առաջնորդ Սելահաթթին Դեմիրթաշից և գրել գրոհայինների ու կառավարական ուժերի միջև բախման հետևանքով կորուստների մասին:
Amnesty International իրավապաշտպան կազմակերպության տվյալներով` ներկայում ՆԱՏՕ-ի անդամ Թուրքիան, որը ձգտում է ԵՄ ինտերգրման, բանտերում պահում է ավելի քան 100 լրագրողի: Ցուցանիշն ավելին է, քան Չինաստանում կամ Իրանում, որոնց Արևմուտքը համարում է մամուլի ազատությունների «ամենաչար» խախտողներ: Դատելով այս ամենից` դիրքերի փոփոխություն է սպասվում: Փաստաբաններից մեկի խոսքով` վարչապետ Էրդողանը բացահայտ սպառնում է լրագրողներին և թելադրում, թե ինչ գրեն:
Վարչապետից հետ չի մնում Ներքին գործերի նախարար Իդրիս Նաիմ Շահինը, որը, մեկնաբանելով գործընթացը, լրագրողների հոդվածները համեմատել է քուրդ ահաբեկիչների արձակած փամփուշտների հետ:
