«Սիրիայում հայ ժողովուրդն իր անվտանգությունն է հսկել. այս մասին տարածել եմ հայտարարություն»,- «Առաջին լրատվական»-ի հետ զրույցում ասաց Բերիո Հայոց թեմի առաջնորդարանի բանբեր Ժիրայր Ռայիսյանը:
Նա տեղեկացրեց, որ այսօրվա հայտարարության մեջ մասնավորապես ասել է, որ Սիրիայում հայ ժողովուրդը ձգտում է զենքի միջոցով խաղաղությունը, բնականոն կյանքը վերադարձնել, այնպես որ` հայերը գործ չունեն ո՛չ ազատբանակայինների, ո՛չ էլ այլ կռվողների հետ:
Ըստ Ժ. Ռայիսյանի՝ հայերն իրենց ժողովրդի խաղաղությունն ու իրենց ապահովությունն են հսկում, և իրենց շտապօգնության մարմինների գոյությունը դրանով է պայմանավորված:
«Հնարավոր է` հայությանը կռիվների մեջ ներքաշելու փորձեր լինեն, բայց հայությունը զինվորական գործողությունների չի մասնակցել: Յուրաքանչյուր նման արտահայտություն ես համարում եմ սադրիչ: Քիչ առաջ ես այդ մասին հայտարարություն եմ արել»,- պարզաբանեց Ժիրայր Ռայիսյանը:
Հարցին, թե սիրիական կառավարությունը հայաշատ թաղամասերին կոչ արել է լքե՞լ բնակարանները, պատասխանեց` այդպիսի հորդոր չի եղել:
«Ես չգիտեմ, թե ինչ տեղեկություններ են սրանք: Սիրիայի իշխանությունները բացարձակապես տները լքելու կոչ չեն արել, ընդհակառակը` Սիրիայի իշխանություններն ասում են, որ ամեն մարդ պետք է իր տանը մնա»,- ասաց Ժիրայր Ռայիսյանը՝ հավելելով, որ այսօր, ինչպես նախորդ օրերին, բախումներ են գրանցվել տարբեր թաղամասերում, այդ թվում` Նոր Գյուղում, բայց իրավիճակն այդքան էլ մտահոգիչ չէ:
Հիշեցնենք, որ տեղեկություններ էին տարածվել, թե Սիրիայի կառավարությունը Նոր Գյուղ թաղամասի բնակիչներին կոչ էր արել լքել բնակարանները` այդտեղ հաստատված ազատբանակայիններին հարված հասցնելու նպատակով: