ԼՂՀ անկախության ճանաչման վերաբերյալ «Ժառանգության» նախաձեռնությունը պետք է օրակարգ մտնի: Այսօր լրագրողների հետ հանդիպմանը այս մասին ասաց «Ժառանգություն» կուսակցության քարտուղար Ստեփան Սաֆարյանը՝ անդրադառնալով Ռամիլ Սաֆարովի էքստրադիցիային:
Ըստ նրա՝ պետք է օրակարգ մտնի ԼՂՀ անկախության ճանաչման վերաբերյալ «Ժառանգության»նախաձեռնությունը: Բանախոսն անընդունելի համարեց այն, որ Հայաստանը մի կողմ թողնի ամեն ինչ և հլու-հնազանդ շարունակի բանակցային գործընթացը: Նա նշեց, որխախտվել է էքստրադիցիայի մասին օրենքը, և բոլոր նրանք, ովքեր նշում են,թե Սաֆարովի էքստրադիցիան տեղի է ունեցել միջազգային իրավունքի շրջանակում, ստում են, քանի որ ըստ էքստրադիցիայի մասին կոնվենցիայի` ստացող երկիրը պարտավորություն է ստանձնում պահպանելու դատավճիռը:
«Առկա են նրան Հունգարիա վերադարձնելու իրավական հիմքերը, այլ հարց է, թե ովքեր են զբաղվում դրանով, և որքան հետևողական կլինի հայկական կողմը»,- ասաց Ստեփան Սաֆարյանը:
Անդրադառնալով խոսակցություններին, թե Րաֆֆի Հովհաննիսյանի փոխարեն ինքն է վերցնելու պատգամավորական մանդատը՝ ասաց, որ մինչ այս պահը «Ժառանգություն»-ում այդմասին քննարկում չի եղել:
«Եթե լինի, մենք ևս կիմանանք, այդ խնդիրը մինչ այս պահը չի քննարկվել, այս պահի դրությամբ ինձ բացառում եմ»,- հստակեցրեց Ստեփան Սաֆարյանը:
