The Daily Telegraph-ը անդրադարձել է Հալեպում քրիստոնյա համայնքի կողմից առաջին անգամ զինվելու և աշխարհազորային խմբեր կազմելու թեմային:
Քրիստոնյա համայնքը փորձում էր կողմնակալություն չդրսևորել Սիրիայում ծավալված քաղաքացիական պատերազմում: Հալեպում համայնքը հավաքագրել էր Սկաուտական շարժման տղաներին` պաշտպանելու եկեղեցիները։ Սակայն պատերազմը ներթափանցեց քաղաքի խորքերը և տարածվեց արվարձաններում` ստիպելով նրանց զենք վերցնել սիրիական բանակից: Նրանք հայկական խմբերի հետ միացան ընդդիմադիր պարտիզանների հարձակումների դեմ պայքարին:
«Բոլոր պայքարում են բոլորի դեմ,- ասել է Հալեպից հայ քրիստոնյա Գևորգը։- Սիրիահայերը կռվում են, քանի որ հավատացած են`Սիրիայի ազատբանակայիններին իրենց դեմ հարձակման են ուղարկել թուրքերը: Քրիստոնյաները ցանկանում են պաշտպանել իրենց թաղամասերը։ Ասադի ռեժիմի քաղաքացիական պաշտպանությունը՝ «Շաբիհա» ռեժիմի աշխարհազորայինները, այստեղ են՝ սպանելու և բռնաբարելու համար, կանոնավոր բանակը կռվում է Սիրիայի ազատ բանակի դեմ, Քրդական աշխատավորական կուսակցությունն էլ իր աշխարհազորայիններն ունի»:
Վերջին 6 շաբաթներին ավելի քան 150 քրիստոնյաներ, այդ թվում` հայեր, զենք են վերցրել իրենց ձեռքը` կասեցնելու ազատբանակայինների մուտքը Հալեպի քրիստոնեական թաղամասեր: Անցած ամիս Սիրիայի բանակը հայտարարեց Ջդեյդա պատմական քրիստոնեական թաղամասը գրոհայիններից մաքրելու հաղթանակի մասին, սակայն քրիստոնյա աշխարհազորայինները The Daily Telegraph-ին պատմել են, որ իրենք առաջինն են հարձակում իրականացրել ազատբանակայինների վրա:
«Ազատբանակայինները թաքնվում էին Ջդեյդայի Ֆարհատ հրապարակում: Եկեղեցական խմբերը գրոհել են և ապստամբներից մաքրել տարածքը: Կառավարական ուժերը մեզ միացել են ավելի ուշ: Նրանք հաղթանակի մասին հայտարարել են պետական հեռուստատեսությամբ,- ասել է Գևորգը, որը, բազմաթիվ քրիստոնյա փախստականների նման, վախից իր ամբողջական անունը չի հայտնել։- Ապստամբները սպառնում էին եկեղեցիներին»:
Բնակիչների խոսքով` տարածքում, որը հայտնի է իր կրպակներով, նեղ սալաքարե փողոցներով, Անտիոքի մարոնիական, ուղղափառ և հայկական եկեղեցիներով, վերջին շաբաթներին իշխել են դիպուկահարների դիրքերն ու փողոցներում տեղակայված հսկիչ անցակետերը: Ներկայումս Բեյրութում գտնվող քահանան, որը ներկայացել է Հովհաննես անունով, մարտի ականատեսն է եղել: Նրա խոսքերով` ազատբանակայինները տեղակայվել էին տանիքներին և հարձակում էին իրականացնում մարոնիական եկեղեցու և սիրիահայերի դեմ:
Հալեպում մարտերը սրվել են, երբ ռազմատենչ ջիհադիստական խմբերը սկսել են ավելի մեծ դեր ունենալ, քան որևէ այլ քաղաքում:
Հալեպի բնակիչները աղբյուրին պատմել են, որ քաղաքի փոքրամասնությունները վախենում են Իրաքի քրիստոնյաների ճակատագիրը կրկնելուց: Իրաքի քրիստոնայները 2003-ին բռնկված պատերազմի ժամանակ դարձել էին աղանդավորական բռնությունների թիրախ:
Հովհաննեսի խոսքերով` Հալեպի փոքրամասնություն կազմող խմբերից և հարուստ բնակիչներից ոչ բոլորն են Ասադի ռեժիմի կողմնակիցներ, սակայն նրանք գիտակցում են, որ պետք է պաշտպանվեն «գեղջուկ էմիգրանտներից», ովքեր, պատերազմական իրավիճակից օգտվելով, փորձում են ավերել քաղաքի սիրտը:
«Ես կառավարության կողմնակից չեմ, սակայն գրոհայինները ավազակներ են: Անձամբ տեսել եմ, թե ինչպես են թալանում տեքստիլ արդյունաբերության գործարանը»,- ասել է հոգևորականը:
Ինչպես տեղեկացրել էինք, չորեքշաբթի Հալեպի օդանավակայանի մոտ ապստամբների կարկահերթի տակ հայտնվելու հետևանքով սպանվել էր 7 հայ, կան տուժածներ:
Ռազմական ներխուժումը երկիր հնարավոր չէ, քանի որ Ռուսաստանն ու Չինաստանը շարունակում են բացասական դիրքորոշում պահպանել Սիրիայի դեմ ճնշումների հարցի շուրջ: Ուրբաթ Սիրիայի հարցով ՄԱԿ-ի և ԱՊԼ-ի հատուկ պատվիրակ Լահդար Բրահիմին կհանդիպի Սիրիայի նախագահ Բաշար Ասադի հետ։ Դա կլինի երկիրը քաղաքացիական պատերազմից փրկելու՝ գործնականում վերջին ջիգը:
Իրավիճակի փոփոխման աննշան հույսեր տածող բազմաթիվ քրիստոնյաներ արդեն միացել են հարյուր հազարավոր փախստականներին: ՄԱԿ-ի տվյալներով` զինված հակամարտության պատճառով Սիրիան լքել է 253 հազար մարդ: Շատ քրիստոնյաներ վերադարձի հույս գրեթե չունեն: