Ինչպես հաղորդում է եգիպտական Al-Misr Al-Youm կայքը, այսօր առավոտյան Եգիպտոսի զինվորական իշխանություններն առաջին անգամ ուժ են կիրառել ցուցարարների դեմ: Սա նորություն է եգիպտական իրականության մեջ` փետրվարի 11-ի հեղափոխությունից ի վեր, երբ նախագահ Հոսնի Մուբարաքը լքեց իր պաշտոնը:
Կայքի փոխանցմամբ, կառավարության շենքի դիմաց, ուր տեղի էր ունենում բողոքի ակցիա` ընդդեմ գործող կառավարության և նրա վարչապետ Ահմեդ Շաֆիկի, որը նշանակվել է Հոսնի Մուբարաքի կողմից, զինվորականները ծեծի են ենթարկել, ապա բաց թողել ցուցարարներին: Որոշ տեղեկությունների համաձայն` զինվորականները նաև զենք են կիրառել` օդ կրակելով ցուցարարներին կառավարության շենքի մոտից հեռացնելու համար:
Ընդդիմության գնահատականների և հերթական գործողությունների վերաբերյալ դեռ տեղեկություններ չկան:
