ԱՄՆ նախագահ Բարաք Օբաման լիբիական Բենգազի քաղաքում ամերիկյան դեսպան Կրիս Սթիվենսի մահից հետո կարգադրել է ողջ աշխարհով մեկ ուժեղացնել ԱՄՆ դիվանագիտական ներկայացուցչությունների անվտանգությունը:
«Ես կարգադրել եմ ապահովել բոլոր անհրաժեշտ ռեսուրսները և աջակցություն` Լիբիայում անձնակազմի անվտանգությունն ապահովվելու համար, ինչպես նաև ուժեղացնել ամբողջ աշխարհով մեկ մեր դիվանագիտական հաստատությունների անվտանգությունը»,- նշվում է Օբամայի հայտարարության մեջ, որը տարածել է Սպիտակ տան մամլո ծառայությունը, հաղորդում է Ria Novosti-ն:
Reuters գործակալությունը, հղում անելով Լիբիայի կառավարությունում անանուն աղբյուրին, նշել է, որ ռմբակոծության ժամանակ նռնակներից մեկն ընկել է ավտոմենքենայի մեջ, որտեղ գտնվել են դիվանագետները: Օբաման քննադատել է դիվանագիտական ներկայացուչության վրա հարձակումը և նշել, որ զոհված դեսպանը սատարում էր Լիբիայի` դեպի ժողովրդվարություն անցումը:
«Ես դատապարտում եմ հարձակումը, որը խլել է 4 ամերիկացու կյանք`ներառյալ դեսպան Սթիվենսի կյանքը: Ես երախտապարտ եմ նրան ծառայության համար և չափազանց տխուր եմ նրա մահվան պատճառով»,- նշել է նախագահը:
