«Ժառանգություն» կուսակցոթյան ԱԺ խմբակցության ղեկավար Ստյոպա Սաֆարյանը մեզ հետ զրույցում անդրադառնալով գազի գնի շուրջ Սերժ Սարգսյանի և Դիմիտրի Մեդվեդևի այն համաձայնությանը, որ գազի գինը 2011թ.-ին չի թանկանալու, նկատեց, որ շատ կուզենար իմանալ, թե այս անգամ որ շահերի հաշվին ենք զիջել։
«Չեմ կարող ասել նաև, թե արդեն ինչ-որ բան ունենք զիջելու։ Վերջին տարիներին առանձնապես ամեն ինչ տրված է` նյութական արժեքների և ազգային հարստության տեսքով, ինչպես նկատելի է` հերթը հասել է ազգային իրավունքներին և այս դաշտում զիջումներ կատարելուն։ Դա հայ-թուրքական արձանագրություններն են. Սերժ Սարգսյանը բորբոքված Հանրային խորհրդի նիստում պնդում էր, թե քանի որ նախկին իշխանությունները կասկածի տակ չեն առել Ղարսի պայմանագիրը, ապա հիմա թող ոչ ոք իրեն չմեղադրի։
Ավելին, որ ինքը ճանաչում է ներկայիս հայ-թուրքական սահմանը կամ պատմաբանների հանձնաժողովի առաջարկին համաձայնելը։ Ուզում եմ ասել, որ Մադրիդյան սկզբունքների դեպքում համաձայն ենք, որ մենք օկուպանտ ենք և կվերադարձնենք օկուպացված հողերը այն դեպքում, երբ ԼՂ-ի տարածքում ևս մեկ անգամ ինքնորոշման իրավունք իրականացվի։ Այսպիսի բաներ։ Դինամիկան այնպիսին է, որ մենք զիջում ենք մեր անկախությունից, զիջում մեր ազգային իրավունքներից, քանի որ այլ` ավելի հետաքրքրություն ներկայացնող ռազմական օբյեկտ գրեթե չի մնացել»,- արձանագրեց Ստյոպա Սաֆարյանը։
