Սեպտեմբերի 11-ին ՀՀ ԱԺ նախագահ Հովիկ Աբրահամյանի մասնակցությամբ տեղի է ունեցել աշխատանքային քննարկում, որը նախաձեռնել էր ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովը: Քննարկմանը մասնակցում էին ԱԺ խմբակցությունների ներկայացուցիչներ, ՀՀ կրթության և գիտության նախարար Արմեն Աշոտյանը, Հայաստանի բարձրագույն ուսումնական հաստատությունների ռեկտորները:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ ԱԺ նախագահ Հովիկ Աբրահամյանը նշեց, որ առաջիկայում ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովին կից կրկին ստեղծվելու է Երիտասարդական խորհրդարան և հավաքի նպատակը ստեղծվելիք Երիտասարդական խորհրդարանի կազմավորման և գործունեության կարգի քննարկումն է:
Դրական և արդյունավետ գնահատելով նախորդ Երիտասարդական խորհրդարանի աշխատանքը` Ազգային ժողովի նախագահը նկատել է, որ այն գործել է ակտիվ և արդարացրել սպասումները: Հովիկ Աբրահամյանը հավաստիացրեց, որ խորհրդարանն այսուհետ ևս կաջակցի ստեղծվելիք Երիտասարդական խորհրդարանի աշխատանքների իրականացմանը, որը, ըստ նրա, լավ դպրոց է ապագա քաղաքական և պետական գործիչների համար:
ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արտակ Դավթյանը ներկայացրել է Երիտասարդական խորհրդարանի կազմավորման և գործունեության կարգի նախագիծը: Նա նույնպես կարևորել է Երիտասարդական խորհրդարանի գործունեությունը և նշել է, որ ԱՊՀ շրջանակում առաջիկայում կստեղծվի Երիտասարդական խորհրդարան, որի հիմքում կլինի Հայաստանի Երիտասարդական խորհրդարանի մոդելը:
Բարձրագույն ուսումնական հաստատությունների ռեկտորները բարձր գնահատելով Երիտասարդական խորհրդարանի գործունեությունն ու նրա նշանակությունը երիտասարդների կրթության, հասարակական ակտիվության խրախուսման գործում` անհրաժեշտ են համարել կառույցի աշխատանքների շարունակականության ապահովումը:
Ողջունելով ԱԺ նախագահի նախաձեռնությունը` ԲՈՒՀ-երի ռեկտորները հանդես են եկել մի շարք առաջարկներով, որոնք, ինչպես հավաստիացրեց ԱԺ նախագահ Հովիկ Աբրահամյանը, մանրամասն կքննարկվեն:
