«Առաջին լրատվական»-ի անգլերեն խմբագրության զրուցակիցն է Գերմանիայի միջազգային հարաբերությունների և անվտանգության ինստիտուտի ավագ օգնական, Կովկասյան և ԱՊՀ երկրների վերլուծաբան Ուվե Հալբախը:
– Ինչպե՞ս եք գնահատում ԵԱՀԿ Մինսկի խմբի համանախագահների պաշտոնական հայտարարությունները Ռամիլ Սաֆարովի էքստրադիցիայի վերաբերյալ: Ի՞նչ են դրանք նշանակում:
– Ինչպես Վաշինգտոնի, Փարիզի, Մոսկվայի ԱԳ նախարարները, այնպես էլ ՆԱՏՕ-ի բարձրաստիճան պաշտոնյան, ԵՄ-ն և Եվրախորհուրդը խորը մտահոգություն և վրդովմունք արտահայտեցին: Պաշտոնական հայտարարությունների ընդհանրությունն այն մտահոգությունն էր, թե էքստրադիցիան բացասականորեն կանդրադառնա հայ-ադրբեջանական հակամարտության բանակցային գործընթացի վրա:
– Ի՞նչ եք կարծում՝ Սաֆարովի էքստրադիցիան կփոխի՞ ստատուս քվոն Հարավային Կովկասում, և ի՞նչ փոփոխություններ եք Դուք կանխատեսում:
– Ես հեռուն չեմ գնա` ասելով, որ հատկապես «Սաֆարով գործարքը» կփոխի ստատուս քվոն Հարավային Կովկասում: Այս տարի տեղի ունեցած իրադարձություններն ու զարգացումները ցույց են տալիս, որ միջազգային քաղաքականությունը պետք է լրջորեն վերաբերվի տարածաշրջանային անվտանգությանը: Լեռնային Ղարաբաղի չլուծված խնդիրը շարունակվում է` շփման գծում հնչում են կրակոցներ: Այս զարգացումները պահանջում են ինտենսիվ կանխարգելիչ միջոցառումներ: Տարածաշրջանային այլ զարգացումները ևս անհանգստացնող են, ինչպես վերջերս Վրաստանի անվտանգության ուժերի և Հյուսիսային Կովկասում ռուսաստանյան զինյալների միջև տեղի ունեցած բախումները:
– Ինչպե՞ս կանդրադառնա Ռամիլ Սաֆարովի էքստրադիցիան Լեռնային Ղարաբաղի կոնֆլիկտի լուծման վրա: Հաշվի առնելով Ռամիլ Սաֆարովի փառաբանումը՝ «Ադրբեջանի ենթակայությամբ Ղարաբաղի ինքնավարություն» ծրագիրը դեռևս ընդունելի՞ է:
– Կոպտագույն հանցագործության, ոճրագործի փառաբանումը, պարգևատրումը Բաքվի իշխանության կողմից կխորացնի արդեն իսկ առկա վստահության պակասը հակամարտող կողմերի միջև: Հակամարտության հոգեբանական հարթությունում ևս սա անհանգստացնող է, որը խաղաղության և վստահության հաստատման համար դժվարին խոչընդոտներ է ստեղծում: Հնարավոր է, որ սա զրոյի հավասարեցնի Լեռնային Ղարաբաղի ինքնավարությունը Ադրբեջանի կազմում տեսնելու թույլ հակումը:
Թարգմանությունը՝ Արաքս Մարտիրոսյանի
