Կամբոջայի իշխանությունները Շվեդիային են արտահանձնել Pirate Bay ֆայլերի փոխանակման կայքի հիմնադիրներից մեկին՝ 2012 թ. սեպտեմբերի 12-ին ձերբակալված Սվարթհոլմ Վարգին: Ավելի վաղ դատարանը պորտալի երեք համահիմնադիրներին դատապարտել էր բանտային ազատազրկման և 3.6 մլն դոլար տուգանքի:
Սակայն Վարգը թաքնվում էր հետաքննությունից: Ծրագրավորողի դեմ միջազգային հետախուզում էր հայտարարվել 2009 թ. այն բանից հետո, երբ նա չհայտնվեց շվեդական բանտում՝ հեղինակային իրավունքների խախտման համար սահմանված իր պատիժը կրելու համար:
Pirate Bay կայքը համարվում է աշխարհի 7 խոշորագույն տորենտ-տրեկերներից մեկը, որն ամբողջ աշխարհում օգտատերերին հնարավորություն է տալիս փոխանակվել երաժշտությամբ, ֆիլմերով, էլեկտրոնային գրքերով և այլն: Ընդ որում, ֆայլերը մնում են օգտատերերի համակարգիչներում, պորտալը միայն տրամադրում է հատուկ տորենտ-ֆայլեր, որոնց օգնությամբ իրականցվում է ներբեռնումը: 2010 թ. մայիսից Pirate Bay-ի համար հոսթինգի ծառայություններ է մատակարարում Շվեդիայի ծովահենային կուսակցությունը:
Կայքը գործում է նաև այսօր՝ չնայած առանձին պետությունների կողմերից այն փակելու փորձերին: 2012 թ. մայիսին Բրիտանիայի իշխանությունները կարգադրեցին ինտերնետ փրովայդերներին արգելափակել կայքի մատչումը:
Դատարանի որոշման մեջ նշվում էր, որ Pirate Bay-ի սեփականատերերը և օգտատերերը «դիտավորյալ կերպով խախտում են հեղինակային իրավունքի մասին օրենքը և մյուսներին դրդում են այն խախտել», ինչով իբր «ոչնչացվում են աշխատատեղերը Մեծ Բրիտանիայում»:
Իրենց հերթին, ծրագրավորողների պաշտպանության ներկայացուցիչները դեռ 2009 թ. նշում էին, որ կայքը նպատակ չունի եկամուտ ստանալ և ստեղծված է բացառապես տեղեկատվության ազատ տարածման համար:
