Ադրբեջանական Trend լրատվական գործակալության փոխանցմամբ՝ Ադրբեջանում ԱՄՆ նորանշանակ դեսպան Ռիչարդ Մորնինգսթարն այսօր Բաքվում լրագրողների հետ ունեցած զրույցում հայտարարել է, որ ԱՄՆ-ի և Ադրբեջանի միջև հարաբերությունները շատ ամուր են.
«Ես մինչև դեսպան նշանակվելս 20 այց եմ կատարել Ադրբեջան: ԱՄՆ-ն ու Ադրբեջանը համատեղ աշխատում են այնպիսի խնդիրների շուրջ, ինչպիսիք են տարածաշրջանային կայունությունը, էներգետիկ անվտանգությունը, ժողովրդավարությունը, մարդու իրավունքները, ահաբեկչության դեմ պայքարը: Իմ նպատակն ԱՄՆ-ի և Ադրբեջանի միջև հարաբերությունների հետագա ակտիվացումն է:
ԱՄՆ-ի և Ադրբեջանի միջև ապրանքաշրջանառության մակարդակն արդեն իսկ բարձր է, սակայն այն կարող է նաև ավելի լավը լինել: Մեր առաջնահերթ առաջադրանքն Ադրբեջանում ավելի շատ ամերիկյան ընկերությունների ներգրավումն է: Ընդ որում, դա վերաբերում է ոչ միայն նավթագազային սեկտորին, այլև այլ ոլորտների:
Ես աջակցում եմ Ռամիլ Սաֆարովի ազատ արձակման վերաբերյալ ԱՄՆ պետդեպարտամենտւ հայտարարությանը. նրան մտահոգում է, որ այդ իրավիճակը չի նպաստում տարածաշրջանի լարվածության նվազմանը: Սակայն մենք հուսով ենք, որ կարող են շարունակել Ղարաբաղյան հակամարտության կարգավորման վերաբերյալ կառուցողական գործընթացը:
Կարևոր է, որ Հայաստանն ու Ադրբեջանը շարունակեն աշխատել ԵԱՀԿ Մինսկի խմբի օգնությամբ՝ գտնելու համար Ղարաբաղյան հակամարտության կարգավորման բանալին: Որպես ԵԱՀԿ Մինսկի խմբի համանախագահ՝ ԱՄՆ-ը, մյուս համանախագահների հետ մեկտեղ, շարունակելու է տվյալ ուղղությամբ աշխատել Հայաստանի և Ադրբեջանի հետ»:
