Այսօր՝ սեպտեմբերի 9-ին, ինչպես ողջ Հայաստանի տարածքում, այնպես էլ Լոռու մարզում անցկացվում են տեղական ինքնակառավարման մարմինների ընտրություններ:
Լոռու մարզում քաղաքապետի ընտրություններ են անցկացվում մարզկենտրոն Վանաձորում, Ախթալայում, Տաշիրում, Ստեփանավանում, Շամլուղում, Թումանյանում:
Թեկնածուների ամենամեծ թվով առանձնանում է մարզկենտրոն Վանաձորը: Այստեղ քաղաքապետի թեկնածուները 5-ն են՝ գործող քաղաքապետ, ՀՀԿ-ական Սամվել Դարբինյանը, Լոռու մարզպետի նախկին տեղակալ, ԲՀԿ-ական Էդիկ Կարախանյանը, «Օրանժ Արմենիա» ընկերության Վանաձորի մասնաճյուղի նախկին կառավարիչ, ՄԻԱԿ անդամ Տարոն Ապրեսյանը, «Պոպուլեքս» փաստաբանական գրասենյակի տնօրեն, անկուսակցական Կարեն Թումանյանն ու անկուսակցական Տիգրան Գրիգորյանը: Ակնկալվում է, որ հիմնական պայքարը կընթանա Սամվել Դարբինյանի ու Կարեն Թումանյանի միջև:
Ի դեպ, բոլոր թեկնածուներն արդեն կատարել են իրենց քաղաքացիական պարտքը և ընտրություն կատարել:
Տաշիրում չի առաջադրվել գործող քաղաքապետ Նշան Սողոյանը, ով քաղաքապետ էր 2002 թվականից: Այստեղ մրցում են 2 անկուսակցական թեկնածուներ` Էդգար Արշակյանն ու Վազգեն Ղազարյանը:
Ընտրական իրավիճակը փոքր-ինչ լարված է Ախթալա քաղաքում: Նախընտրական օրերին տեղի ունեցած հայտնի միջադեպերը բավականին լարված իրավիճակ են ստեղծել քաղաքում, բնակչության մեջ փոքր-ինչ կորել է վստահությունը գործող քաղաքապետ, քաղաքապետի թեկնածու Հայկազ Խաչիկյանի հանդեպ, մինչդեռ վերջինս վստահ է, որ Ախթալայում տեղի ունեցած դեպքերը որևէ կերպ չեն ազդի ընտրական գործընթացի վրա: Այստեղ մրցում են ներկա և նախկին քաղաքապետերը, 2-ն էլ Հանրապետական կուսակցության անդամ՝ Հայկազ Խաչիկյանն ու Սուրեն Թամազյանը:
Ստեփանավան քաղաքում արդեն երրորդ անգամ իր թեկնածությունն է առաջադրել գործող քաղաքապետ, անկուսակցական Սարգիս Ղարաքեշիշյանը: Նրա մրցակիցներն են ԲՀԿ-ական Սերգեյ Մարգարյանն ու անկուսակցական Վարդան Գրիգորյանը:
Շամլուղ քաղաքում մրցում են 2 թեկնածուներ՝ գործող քաղաքապետ, ՀՀԿ անդամ Լենդրուշ Բեժանյանը, ով քաղաքապետ է 2002 թվականից, և անկուսակցական Լևոն Առաքելյանը:
Միայն Թումանյան քաղաքն է, որ ունի ընդամենը քաղաքապետի մեկ թեկնածու՝ գործող քաղաքապետ, ՀՀԿ-ական, ՀՀԿ «Մոտկորի» տարածքային կուսակցության նախագահ Լևոն Զավարյանը: Վերջինս բոլոր թեկնածուների մեջ «ամենաստաժավոր»-ն է. նա Թումանյանի քաղաքապետն է 1996 թվականից ի վեր:
