Թուրքական Anadolu գործակալության փոխանցմամբ՝ Թուրքիայի՝ Եվրամիության հարցերով պետնախարար ու գլխավոր բանագնաց Էգեմեն Բաղըշը լրագրողների հետ զրույցում հերթական «հայկական» զգուշացումն է արել Ֆրանսիային՝ անդրադառնալով ֆրանսիական պատմական դասագրքերում Հայոց ցեղասպանության ընդգրկվելուն ու Ֆրանսիայի նախագահ Ֆրանսուա Օլանդի կողմից Հայոց ցեղասպանության հերքումը քրեականացնող օրինագծի ընդունման ուղղությամբ աշխատանքներին.
«Ֆրանսիայի կառավարությունը խոստովանել է, որ դասագրքերում պատմության մեջ չեղած կեղծիքի ներառումը կնպաստի սերնդի թունավորմանը: Ինչպես և ոչ վաղ անցյալում, այնպես էլ ներկայումս Ֆրանսիայի ղեկավարությունը մտածում է ոչ թե հետագա սերունդների, այլ՝ ապագա ընտրությունների մասին:
Չպետք է հեռու գնալ՝ տեսնելու համար այն ղեկավարների վախճանը, որոնք չեն մտածել հետագա սերունդների մասին: Հարգարժան Օլանդի համար բավական է հիշել իր նախորդին, որին ֆրանսիացիներն ուղարկեցին ձուկ բռնելու: Ես հպարտանում եմ Թուրքիայի պատմությամբ: Թուրքիայի պատմությամբ պետք է հպարտանալ: Անհնար է նրան մեղադրել կամ դատապարտել որևէ բանում»:
