Ռուսական ВЗГЛЯД թերթի փոխանցմամբ՝ 2003 թվականին Վրաստանում իրականացված «վարդերի հեղափոխությունից» առաջ և հետո Վրաստանում ԱՄՆ նախկին դեսպան Ռիչարդ Մայլզը վրացական «9-րդ ալիքին» տված հարցազրույցի ժամանակ հայտարարել է, որ նախագահ Միխեիլ Սաակաշվիլիի իշխանությունը մեծ սխալ է թույլ տվել՝ վատթարացնելով Ռուսաստանի հետ հարաբերությունները.
«Վրաստանի նախկին նախագահ Էդուարդ Շևարդնաձեն հասկանում էր Ռուսաստանի հետ հարաբերությունների կարևորությունը, մինչդեռ նրան փոխարինած Սաակաշվիլին հաճախ այնպես էր անում, որ զայրացներ Ռուսաստանի իշխանություններին ու հասարակությանը:
Ես հաճախ եմ Ռուսաստանի հետ լավ հարաբերությունների կարևորության շուրջ զրուցել Սաակաշվիլիի ու նրա շրջապատի հետ: Վրաստանի համար իր բնական հարևան Ռուսաստանի հետ վատ հարաբերություններ ունենալը մեծ սխալ է: ԱՄՆ-ը ողջունում է Ռուսաստանի ու Վրաստանի միջև քաղաքական, տնտեսական և ռազմական հարաբերությունների կարգավորումը:
Ինչ վերաբերում է հոկտեմբերի 1-ին Վրաստանում կայանալիք խորհրդարանական ընտրություններին, ապա եթե դրանք վատ անցկացվեն, ապա դա մեծապես կհիասթափեցնի միջազգային հանրությանը և կխոչընդոտի Վրաստանի արտաքին կապերի զարգացմանը:
Հենց խորհրդարանական ընտրությունների արդյունքների կեղծումը հանգեցրեց «վարդերի հեղափոխությանը»: Այդ հեղափոխությունից հետո ամերիկյան կողմը հիասթափվել է Վրաստանում ժողովրդավարական զարգացումներից, նրա արտաքին քաղաքականությունից»:
