Չինաստանի հարավ-արևմուտքում՝ Յուննան և Գույչժոու մարզերում տեղի ունեցած երկրաշարժի հետևանքով զոհերի թիվը հասել է 89-ի, ավելի քան 700 մարդ վիրավորվել է: Այս մասին հաղորդում է Interfax-ը՝ վկայակոչելով տեղի ԶԼՄ-ները:
Տեղի իշխանությունների հաղորդմամբ՝ զոհերի թվի վերաբերյալ տվյալներն առայժմ նախնական բնույթ են կրում. այդ թիվը զգալիորեն կարող է աճել:
Երկրաշարժի ծանր հետևանքների կապակցությամբ Վլադիվոստոկում Ասիախաղաղօվկիանոսյան տնտեսական համագործակցության գագաթնաժողովին մասնակցող Չինաստանի նախագահ Հու Ցզինտաոն կարգադրել է տուժածներին տրամադրել առավելագույն օգնություն, իսկ Պետխորհրդի վարչապետ Վեն Ցզյաբաոն մեկնել է տուժած շրջաններ՝ տեղում փրկարարական և աղետի հետևանքների վերացման աշխատանքները ղեկավարելու:
Հիշեցնենք, որ ուրբաթ Յուննան և Գույչժոու մարզերում, տեղի ժամանակով ժամը 11:00-ին գրանցվել էր երկու ստորգետնյա ցնցում՝ 5.7 և 5.6 մագնիտուդ ուժգնությամբ:
Երկրաշարժի հետևանքով փլուզվել են տասնյակ հազար տներ, առավել տուժած շրջաններում շարքից դուրս են եկել էլեկտրամատակարարման և կապի համակարգերը, ճանապարհների վրա կուտակումներ են առաջացել, ինչը բարդացնում է փրկարարների աշխատանքը:
