Քաղաքապետարանի քաղաքաշինության խորհրդին առընթեր բնապահպանական հանձնաժողովը կփորձի կասեցնել քաղաքում քաղաքաշինության ստեղծած բնապահպանական աղետալի դրությունը: Այսօր այս մասին լրագրողների հետ զրույցում ասաց քաղաքապետարանի քաղաքաշինության խորհրդին առընթեր բնապահպանական հանձնաժողովի նախագահ Կարինե Դանիելյանը՝ հանձնաժողովի քարտուղար Դիանա Գրիգորյանի, հանձնաժողովի անդամ, բնապահպան, իրավաբան Ռուզաննա Ղազարյանի հետ համատեղ ներկայացնելով հանձնաժողովի ստեղծման անհրաժեշտությունը:
Կարինե Դանիելյանն ասաց, որ Երևան քաղաքի էկոլոգիական իրավիճակը բարվոք չէ, դա նորություն չէ: «Քաղաքների համար ամենախոցելի հատվածը կենտրոնն է, կարծիք կա, որ քաղաքներն աշխատում են որպես ջերմության կղզյակներ և օդային ավազանի հոսքերը կենտրոն են գալիս, դրա համար քաղաքները սովորաբար փորձում են ավելի կանաչապատել: Մենք այս տարիների ընթացքում արել ենք հակառակը: Կենտրոնը գնալով խտացել է, բիզնեսը բերել ենք կենտրոն, նաև մեքենաները, կենտրոնը էկոլոգիական աղետի գոտի է դարձել»,- ասաց Կարինե Դանիելյանը:
Խոսելով նորաստեղծ հանձնաժողովից՝ նա ասաց, որ հուլիսի 27-ին քաղաքապետ Տարոն Մարգարյանը ստորագրել է հանձնաժողովի ստեղծման հրամանը: Նրա տեղեկացմամբ՝ հանձնաժողովի կազմում ընդգրկված են հասարակական կազմակերպությունների անդամներ, գիտության, կրթության մասնագետներ, քաղաքապետարանի ներկայացուցիչը: Ըստ բնապահպանի՝ հանձնաժողովի տարբեր խորհուրդները քննարկելու են քաղաքի առջև ծառացած բնապահպանական առաջնահերթությունները:
«Մշակվում է կանոնակարգը, սա խորհրդատվական մարմին է, մեզնից չորս հոգի քաղաքաշինական խորհուրդ պետք է գործուղվեն, բազմաթիվ հարցեր քննարկելու ենք, որոշելու ենք, մեր որոշումները ներկայացնելու ենք քաղաքապետին: Մենք ոչ մի կերպ չէինք կարողանում մտնել միջազգային ցանցերի մեջ, կայուն քաղաքների ցանկում, մեզ չի հաջողվել առ այսօր քաղաքապետարանին ներգրավել, միայն այսօր է մեզ հաջողվել այդ գործընթացը սկսել: Մենք մտնում ենք պատերազմի մեջ քաղաքի քաղաքաշինության դեմ: Ապամոնտաժման գործընթացներ երևի թե չենք կարողանում սկսել, հիմա քննարկման փուլում է մեր իրավասությունների հարցը»,- ասաց Կարինե Դանիելյանը:
Դիանա Գրիգորյանն ասաց, որ քաղաքապետարանը այլ գործելակերպ է մշակել․ «Նախկինում չի եղել համագործակցություն վարչությունների միջև: Այսօր քաղաքապետարանի բնապահպանական վարչությունն ակտիվ մասնակցում է այլ վարչությունների հետ, որովհետև շատ խնդիրներ կան, որոնք մեր վարչությունը չի լուծում: Բնապահպանության վարչության դրական եզրակացությունն է պետք ցանկացած որոշման համար»:
