Վրաստանում շարունակվում է խորհրդարանական ընտրությունների նախընտրական քարոզչությունը: Ինչպես արդեն կանխատեսում էին շատերը, մրցակցությունը ծավալվել է երկու՝ Վրաստանի նախագահ Միխեիլ Սաակաշվիլիի ղեկավարած «Միասնական ազգային շարժում» և Բիձինա Իվանիշվիլու ղեկավարած «Վրացական երազանք» կուսակցությունների միջև:
Այս մասին «Առաջին լրատվական»-ի հետ զրույցում ասաց «Բազմազգ Վրաստան» քաղաքացիական շարժման նախագահ Առնոլդ Ստեփանյանը՝ անդրադառնալով Վրաստանում նախագահական ընտրություններին: Նա նկատեց, որ ճնշումներ կան ընդդիմադիր «Վրացական երազանք» կուսակցության ակտիվիստների նկատմամբ, քանի որ իշխող կուսակցությունը ի դեմս այս կուսակցության ուժ է տեսնում:
Ըստ Ա. Ստեփանյանի՝ շարունակական ճնշումների պատճառը նաև այն է, որ Բիձինա Իվանիշվիլու ղեկավարած կուսակցությունը ֆինանսական լուրջ միջոցներ ունի, որը հնարավորություն է տալիս լավ քարոզչություն իրականացնել, ինչը ձեռնտու չէ իշխող կուսակցությանը: «Ամեն հնարավոր եղանակներով խոչընդոտում են քարոզչությանը»,- ասաց Առնոլդ Ստեփանյանը:
Նա նաև ասաց, որ արդեն ավարտվել է կուսակցությունների առաջադրումների ժամկետը: Առնոլդ Ստեփանյանի խոսքով՝ սրանից հետո հայտնի դարձավ, որ երկու ֆավորիտ կուսակցությունների ցուցակներում բավական շատ են ազգությամբ հայ թեկնածուները, մեծամասնական ընտրակարգով առաջադրված թեկնածուներ ևս կան:
Կառավարական կուսակցության առաջին հայ թեկնածուն 41-րդ համարն է Հենրիխ Մուրադյանը, որը Վրաստանի հայերի միության ղեկավարն է, իսկ «Վրացական երազանք» կուսակցության ցուցակով առաջադրվածառաջին հայը համար 38-րդն է: «Մեծամասնական ընտրակարգով առաջադրված հայեր ևս կան, որոնցից երկուսը, կարծում եմ, կհայտնվեն խորհրդարանում»,- կանխատեսեց Առնոլդ Ստեփանյանը:
