ԱՄՆ նախագահի հանրապետական թեկնածու Միթ Ռոմնին սեպտեմբերի 6-ին ցանկություն է հայտնել Բարաք Օբամայից լսելու հաշվետվություն չիրականացրած խոստումների վերաբերյալ: Այս մասին հաղորդում է Agence France-Presse-ը:
Իր ծրագրին առնչվող ելույթում Ռոմնին լրագրողներին հայտնել է, որ Օբաման նոր խոստումներ տալու փոխարեն պետք է համագումարի իր ելույթում հայտնի, թե ինչու չի իրականացրել հին խոստումները, որոնք վերաբերում են ամերիկյան բյուջեի պակասուրդի կրկնակի կրճատմանն ու գործազուրկներին աշխատատեղերով ապահովմանը:
Ինչպես ակնհայտ դարձավ, Օբաման չներկայացրեց մրցակցի պահանջած հաշվետվությունը: Ի դեպ, Ռոմնին հայտնել էր, որ չէր լսելու Օբամայի ելույթը:
Հիշեցնենք, որ Մասաչուսեթսի նախկին նահանգապետ Միթ Ռոմնին Օբամայի գլխավոր մրցակիցն է: Հանրապետական թեկնածուն համաձայնել էր առաջադրվել որպես նախագահի թեկնածու` Ֆլորիդայում օգոստոսի 31-ին կայացած համագումարի ժամանակ:
ԱՄՆ-ում նախագահական ընտրությունները կանցկացվեն նոյեմբերի 6-ին:
