Ինչպես նշել է ՄԱԿ-ում Լիբիայի պատվիրակության ղեկավարի տեղակալ Իբրահիմ Դաբաշին, Քադաֆիի ստորաբաժանումներն իրենց վայրագության հետքերը կորցնելու համար փողոցներից դիակները հավաքում են և ինքնաթիռների միջոցով «կորցնում» դրանք անապատներում: Այս մասին Դաբաշին հայտնել է BBC հեռուստաալիքին:
Քադաֆիի կառավարության նախկին անդամ, արդարադատության նախկին նախարար Մուստաֆա Աբդ Ալ-Գալիլը երեկ հարցազրույց է տվել Al-Jazeera հեռուստաընկերությանը` ներկա լինելով արևելյան Լիբիայի ցեղերի և ցեղամիությունների ղեկավարների հավաքին: Նախկին նախարարը շեշտել է, որ Քադաֆին ունի քիմիական և կենսաբանական զենք, որը կարող է գործի դնել խաղաղ ազգաբնակչության դեմ: «Վերջում, երբ ճնշման տակ լինի, նա կարող է գնալ ցանկացած քայլի: Քադաֆին կարող է այրել իրենից հետո ամեն ինչ»:
Քադաֆին երեկ ևս մեկ լուրջ հարված է ստացել: Նրա շրջապատից հեռացել է Ահմեդ Քադաֆ Ալ-Դամը, որը Լիբիայի հատուկ ծառայությունների կարևոր ներկայացուցիչներից էր: Ալ-Դամը նաև Քադաֆիի հորեղբորորդին է: Իր տարածած հայտարարության մեջ նա նշել է, որ մեկնել է Կահիրե` ի նշան բողոքի ժողովրդի դեմ կիրառված բռնությունների դեմ:
Երեկ Լիբիայի ղեկավարի համար անհանգստանալու ևս մեկ առիթ է առաջացել. Շվեյցարիայում արգելափակվել են նրա հաշվեհամարները: Շվեյցարիայի արտգործնախարարությունն այս մասին հայտնել է հաղորդագրության մեջ՝ նշելով, որ նման քայլը պայմանավորված է այն ծանր իրավիճակով, որ առաջացել է հյուսիսաֆրիկյան այդ պետությունում: Այս մասին հաղորդում է Associated Press գործակալությունը: Հիշեցնենք, որ նմանատիպ որոշումներ էին ընդունվել նաև Թունիսի և Եգիպտոսի նախկին բարձրաստիճան պաշտոնյաների, այդ թվում` նախկին նախագահների և նրանց ընտանիքների վերաբերյալ:
Միջազգային հանրությունը, բացի Քադաֆիի հնարավորությունների սահմանափակումից, քննարկում է նաև ստեղծված իրավիճակից դուրս գալու ուղիները: Երեկ ԱՄՆ նախագահ Բարաք Օբաման այս հարցին անդրադարձել է Ֆրանսիայի, Մեծ Բրիտանիայի և Իտալիայաի ղեկավարների հետ ունեցած հեռախոսազրույցի ժամանակ: Ըստ Սպիտակ տան տարածած հաղորդագրության` պետությունների ղեկավարները քննարկել են ինչպես հումանիտար օգնության տրամադրման, այնպես էլ լիբիական իշխանությունների դեմ համապատասխան միջոցներ ձեռնարկելու հարցը:
Տեղեկացնենք նաև, որ մամուլում երեկ տեղեկություններ կային, թե զոհերի թիվը հասել է 2,000-ի: