Ամերիկյան Foreign Policy պարբերականում այսօր հրապարակվել է Corrupistan խորագրով մեծ հոդված, որում խոսվում է Կենտրոնական Ասիայի ու Ադրբեջանի իշխող ընտանիքների հարստության մասին.
«Ադրբեջանի նախագահական ընտանիքն իր կարողությունը դիզել է երկրի նավթային սեկտորի շահույթների հաշվին: 1993 թվականին իշխանությունը զավթած Հեյդար Ալիևի նախագահության ժամանակ նրա որդի Իլհամը SOCAR ընկերության փոխնախագահն էր, որը վերահսկում էր երկրի 7 միլիարդ բարել նավթը: Երբ Հեյդարը մահացավ, 2003 թվականին նախագահությունը կոշտ վերահսկվող ընտրությունների միջոցով փոխանցվեց Իլհամին:
Ադրբեջանի օրենքները կառավարական չինովնիկներին՝ ներառյալ նախագահին, արգելում են ունենալ բիզնես, սակայն այդպիսի սահմանափակումներ չեն գործում նրանց ընտանիքների անդամների նկատմամբ: «Ազատություն» ռադիոկայանի հետաքննությունն ի հայտ է բերել օֆշորային ընկերությունների ու էլիտար անշարժ գույքի մեծ ցանկը, որը գրանցված է Իլհամ Ալիևի երեխաների անուններով:
Օրինակ` նրա դուստրեր Լեյլա և Արզուն համապատասխանաբար 27 և 23 տարեկանում բառացիորեն լողում են ոսկու մեջ: 2007 թվականին իշխանությունները International Mineral Resources Operating Company-ին (AIMROC) հանձնեց Չովդար գյուղի մոտ գտնվող ոսկու հանքավայրի 70 տոկոսը, իսկ պետությունը պահպանեց մնացած 30 տոկոսը:
Այդ հանքավայրի պաշարները կազմում են 44 տոննա ոսկի և 164 տոննա արծաթ՝ 2.5 միլիարդ դոլար: AIMROC-ը փաստացիորեն պատկանում է Պանամայում գրանցված երեք հոլդինգների, որոնք գրանցված են Լեյլա և Արզու Ալիևաների անուններով: Այլ հետազոտությունները ցույց են տվել, որ համանման կառույցներ են առկա նաև արդյունաբերության մյուս ճյուղերում՝ բանկային ոլորտ, կոմունիկացիաներ, ավիացիա և այլն:
Washington Post-ի տվյալներով՝ Իլհամ Ալիևի երեխաները Դուբայում գնել են 75 միլիոն դոլար արժողությամբ անշարժ գույք: Լեյլա Ալիևան փորձում է բարելավել իր ընտանիքի իմիջը, որը լեցուն է ընդդիմության հանդեպ գործադրված բռնություններով, լրագրողների ու բլոգերների ձերբակալություններով: Նա դա անում է «Հեյդար Ալիև» հիմնադրամի բարեգործական ակցիաներով: Լեյլան այդ հիմնադրամի փոխնախագահն է»:
