Թուրքական Zaman թերթում հրապարակվել է Մեհմեթ Քամըշի «Արևելքի փոքրամասնությունների հարցը» խորագրով հոդվածը, որում ասվում է.
«Ներկայումս չլուծված է մնում Արևելքի փոքրամասնությունների հարցը: Ինչ էլ որ ասեն, ակնհայտ է, որ Մերձավոր Արևելքում «Արաբական գարուն» անվանումը ստացած գործընթացը բարենպաստ հետևանքներ է ունենալու այդ տարածքների համար: Իրադարձությունների զարգացումը ցույց է տալիս, որ այդ գործընթացն արդյունավետ է լինելու ժողովրդավարության հաստատման տեսանկյունից, որը ցայժմ խորթ է եղել իսլամական աշխարհին:
Ժողովրդավարությունը, առաջին հերթին արաբական աշխարհում, կոչված է ցույց տալ, թե ինչպիսի իրավունքներ է ունենալու մեծամասնությունը: Մենք հուսով ենք, որ «Արաբական գարունը» կհստակեցնի նաև փոքրամասնությունների տեղը Մերձավոր Արևելքում:
Արևմուտքը սեփական ուղին է ընտրել տվյալ հարցի լուծման համար. չգերիշխող խմբերի կա՛մ ամբողջովին ձուլում, կա՛մ էլ ոչնչացում: Չձուլված հրեաները ստիպված են եղել հարյուրավոր տարիներ ապրել մեկուսացված շրջաններում կամ էլ տանել բազմաթիվ ապօրինություններ:
Մինչդեռ Արևելքում պատմության ընթացքն այլ է եղել: Արևելյան երկրների տիրակալներն էթնիկ կամ կրոնական համայնքներին չեն ստիպել նմանվել իրենց: Օսմանյան կայսրության փլուզումից հետո Մերձավոր Արևելքի, Կովկասի ու Բալկանների նախկին էթնիկ կառույցը պահպանվեց: Դրա հետ մեկտեղ փոքրամասնությունները կարող էին գործել առևտրային, կրթական և կրոնական ոլորտներում:
Ներկայիս Սիրիայում 10 տոկոս կազմող փոքրամասնությունն ունի միասնական քվեի ու երկրի ղեկավարման իրավունք: Ակնհայտ է, որ իսլամական աշխարհում ժողովրդավարության տարածումը կպահպանի մեծամասնության իրավունքները: Դրա հետ մեկտեղ նախկինի նման կերաշխավորվեն փոքրամասնությունների իրավունքները:
Ողջ իսլամական աշխարհում ու բուն Թուրքիայում հասունացել է հասարակական նոր պայմանագրի կնքման անհրաժեշտությունը: Այդ պայմանագրով բոլոր ժողովրդավար երկրներում մեծամասնությունը կունենա ձայնի զգալի իրավունք, և դրա հետ մեկտեղ կպաշտպանվեն բոլոր փոքրամասնությունների իրավունքները»:
