Новости-Грузия-ի փոխանցմամբ՝ ԱՄՆ-ի Ազգային դեմոկրատական ինստիտուտը (NDI) հոկտեմբերի 1-ին կայանալիք խորհրդարանական ընտրություններից առաջ ներկայացրել է Վրաստանում հասարակական կարծիքի հետազոտման վերաբերյալ անցկացրած հերթական հարցախույզի արդյունքները: Այս մասին հայտարարել է NDI-ի մամլո ծառայությունը:
Վերջինիս հաղորդմամբ՝ հարցախույզն անցկացվել է հուլիսի 31-ից մինչև օգոստոսի 12-ն ընկած ժամանակահատվածում: Հարցախույզին մասնակցել է 2038 մարդ: Նրանց 77 տոկոսը պատրաստակամություն է հայտնել մասնակցել խորհրդարանական ու նախագահական ընտրություններին, եթե դրանք անցկացվեն հաջորդ օրը:
23 տոկոսը հայտարարել է, որ չէր մասնակցի այդ ընտրություններին: 13 տոկոսը կարծում է, որ հոկտեմբերի 1-ին կայանալիք խորհրդարանական ընտրությունները կանցկացվեն «շատ լավ», 47 տոկոսը՝ «քիչ թե շատ լավ», 18 տոկոսը՝ «մասամբ կկեղծվի», իսկ 3 տոկոսը՝ «ամբողջությամբ կկեղծվի»: Մնացյալը դժվարացել են պատասխանել այդ հարցին:
42 տոկոսը կարծում է, որ Վրաստանում առկա է ժողովրդավարություն, 40 տոկոսը համաձայն չէ դրա հետ: Մնացածը դժվարացել են պատասխանել այդ հարցին: 63 տոկոսը դրականորեն է գնահատել վարչապետի պաշտոնում ներքին գործերի նախկին նախարար Վանո Մերաբիշվիլիի նշանակումը: 16 տոկոսը համակարծիք չէ դրա հետ, իսկ մնացածը դժվարացել են պատասխանել:
