Մինչ Հայաստանում քննարկվում է այն հարցը, որ Ռուսաստանն ուշացած ու ոչ համարժեք հայտարարություն արեց Ռամիլ Սաֆարովի արտահանձնման ու արդարացման վերաբերյալ, ռուս փորձագետները կարծում են, որ ՌԴ-ն չի փոխել իր դիրքորոշումը ռազմավարական գործընկեր Հայաստանի նկատմամբ:
Ռազմավարական մշակույթի ռուսական հիմնադրամի փոխնախագահ Անդրեյ Արեշևը «Առաջին լրատվական»-ի հետ զրույցում ասաց, որ Ռուսաստանի համար Սաֆարովի արտահանձնումը եղել է այնքան անակնկալ, որքան Հայաստանի համար: «Չգիտես ինչու, Սաֆարովի արտահանձնման հարցում տարօրինակ մեղադրանքներ են հնչում Ռուսաստանի հասցեին, չնայած Սաֆարովին արտահանձնած երկիրը ՆԱՏՕ-ի անդամ է, սերտ հարաբերություններ ունի ՆԱՏՕ-ի անդամ մյուս երկրների և ԱՄՆ հետ: Ես կարծում եմ, որ Ռուսաստանը շահագրգռված չէր դեպքերի նման զարգացմամբ: Ե՛վ Ռուսաստանի ԱԳՆ-ի, և՛ ՀԱՊԿ գլխավոր քարտուղարի հայտարարությունը հստակ ապացուցում են, որ Մոսկվայում մտահոգված են դեպքերի նման զարգացմամբ»,- ասաց Արեշևը:
Հարցին, թե այդ դեպքում ինչու ուշացավ պաշտոնական Մոսկվայի հայտարարությունը և այն այնքան դիպուկ չէր, որքան, օրինակ, ԱՄՆ նախագահի հայտարարությունը, փորձագետը նշեց, որ պետք չէ ուշադրություն դարձնել այն հանգամանքի վրա, թե ով ավելի շուտ հայտարարեց, ով` ավելի ուշ: Նրա համոզմամբ, այս գործում ԱՄՆ-ն շահող է դուրս եկել: Իսկ Ռուսաստանը, ըստ նրա, չի պատկանում այն երկրների թվին, որոնք ինչ-որ դիվիդենտներ են փորձում շահել Սաֆարովի արտահանձնման հարցում: «Այնպես որ, պետք չէ ուրախանալ նրանով, որ ԱՄՆ Պետդեպը կամ Բարաք Օբաման հրատապ արձագանքեցին: Այն, որ նրանք հրատապ արձագանքեցին, ապացուցում է, որ նրանք կարող էին նախօրոք տեղեկացված լինել այդ մասին: Կարող էին տեղյակ լինել նախապատրաստվող արտահանձնման մասին և քայլեր չձեռնակեցին դա կանխելու համար»,- կարծում է Անդրեյ Արեշևը:
Հարցին, թե տեղի ունեցածը կարո՞ղ է հանգեցնել ստատուս քվոյի և ընդհանրապես աշխարհաքաղաքական փոփոխությունների, մեր զրուցակիցը կանխատեսեց, որ դրա արդյունքում բանակցությունները դե ֆակտո կկանգնեցվեն, կողմերի դիրքորոշումներն ավելի կկոշտանան: Դա, ըստ նրա, ձեռնտու չէ Ռուսաստանին: «Եթե դուք կարծում եք, որ դա Ռուսաստանի հետաքրքրությունների շրջանակում է, ապա սխալվում եք: Ես կարծում եմ, որ դա ձեռնտու է այն ուժերին, ովքեր հետաքրքրված են Հարավային Կովկասում լարվածության ստեղծմամբ և պահպանմամբ, որպեսզի իրենց աշխարհաքաղաքական ծրագրերը իրագործեն: Իսկ Ռուսաստանի համար անընդունելի է իրավիճակի սրումը առաջին հերթին որպես Մինսկի խմբի համանախագահող երկիր: Սա այն հարցն է, որը չպետք է շահարկել, Ռուսաստանը բարդ իրավիճակում է այսօր, քանի որ շահագրգռված է տարածաշրջանում կայունության ապահովմամբ»,- ընդգծեց նա:
