Հնդկաստանում «Հիտլեր» խանութի սեփականատերերը տեղի հրեական համայնքի և Իսրայելի կառավարության բողոքից հետո համաձայնել են փոխել խանութի անվանումը: Այս մասին հաղորդում է The Times of India-ն:
Արևմտյան ապրանքանիշների տղամարդկանց հագուստի խանութը Գուջարաթ նահանգի Ահմեդաբադ քաղաքում բացվել է 2012 թ. օգոստոսին, ընդ որում՝ «i» տառի կետը փոխարինված է եղել սվաստիկայով:
Հրեական համայնքի՝ անվանումը փոխելու խնդրանքին ի պատասխան, խանութի սեփականատերերից մեկը հայտարարել էր, որ պատրաստ է դա անել, եթե բնակիչները փոխհատուցեն բոլոր ծախսերը: Սակայն ավելի ուշ խանութը վերանվանելու պահանջին միացել է Մումբայում Իսրայելի գլխավոր հյուպատոս Օրնա Սագիվը, ըստ որի՝ իրենք բողոքներ են ստանում ամբողջ աշխարհի հրեաներից:
Ռաջա շահը՝ խանութի սեփականատերերից մեկը, հայտարարել է, որ խանութին այդ անվանումն է տվել ի պատիվ իր պապի, որին Հիտլեր էին անվանում իր կոշտ բնավորության պատճառով: Նրա խոսքերով՝ նախքան խանութի բացումը, ինքը գրեթե ոչինչ չի իմացել ֆյուրերի մասին: Շահը հայտնել է, որ խանութը վերանվանելու պահանջով իրեն արդեն տասնյակ մարդիկ են զանգահարել:
2010 թ. հրեական մամուլում նյութեր էին հրապարակվում, որոնց համաձայն՝ Հնդկաստանում և Պակիստանում լայնորեն տարածված է Հիտլերի պաշտամունքը:
Սվաստիկան, որը 20-րդ դարում դարձել էր նացիզմի խորհրդանիշը, Հնդկաստանում ավանդաբար դիտվում է որպես արևի, կյանքի, առատության նշան և հաճախ պատկերվում է տների ու փոխադրամիջչոցների վրա, կիրառվում է հարսանիքների և այլ տոնախմբությունների ժամանակ:
