AntiSec հաքերային խմբի անդամները Twitter-ի իրենց բլոգում հայտարարել են Apple-ի սարքերից 12 մլն UDID նույնականացման համարների և անձնական այլ տվյալների գողության մասին: Որպես ասվածի ապացույց` նրանք համացանցում հրապարակել են գողացված տվյալներից 1 միլիոնը: Այս մասին հաղորդում է RIA Novosti-ն:
AntiSec-ի ներկայացուցիչների հավաստմամբ՝ տվյալների ֆայլը դեռևս մարտին ստացվել է Հետաքննությունների դաշնային բյուրոյի գործակալի կոտրված համակարգչից:
UDID-ը նույնականացման համար է, որը նախկինում լայնորեն կիրառվել է Apple iOS բջջային օպերացիոն համակարգով սարքերի ճանաչման համար: Այն արդեն հնացել է, և այս տարվա գարնանը Apple-ն իր App Store-ում դադարեցրել է UDID-ով հավելվածների տեղադրումը:
AntiSec հաքերային խումբը կազմավորվել է 2011 թվականին՝ աղմկալի գործունեությամբ հայտնի, նախկինում անկախ հաքերային երկու խմբավումների՝ Anonymous-ի և LulzSec-ի միավորումից:
