«Ընդդիմադիր ուժերը, ըստ իս, պետք է որոշակի փոխհամաձայնեցված գործողություններ կատարեն»,- այսօր լրագրողների հետ հանդիպման ժամանակ ասաց ԱԺ «Ժառանգություն» խմբակցության պատգամավոր Արմեն Մարտիրոսյանը:
«Ընդդիմությունը, այնուամենայնիվ, միասնական օրակարգ պետք է ձևավորի, խոսքը չի վերաբերում մեկը մյուսին միանալուն կամ խոշոր կառույց ձևավորելուն, խոսքը համատեղ գործողությունների պլանի մասին է: Եվ այդ համատեղ գործողությունների իրականացման հրամայականը շատ հրատապ է` հաշվի առնելով այն սոցիալական վիճակը, որ կա երկրում, և որը ցանկացած պարագայում, եթե մնա առանց լուծման, միանշանակորեն ունենալու է պետությունը վտանգող լուծում»,- ասաց Ա. Մարտիրոսյանը:
Հարցին, թե ինչպես է «Ժառանգությունը» պատկերացնում այդ միասնական օրակարգը և գործողությունների պլանը, Ա. Մարտիրոսյանը պատասխանեց, որ այն նախ և առաջ պետք է հիմնվի հավասար գործընկերության սկզբունքի վրա:
