Սիրիայի անվտանգության ուժերը փակում են Դամասկոս տանող ճանապարհները` կասեցնելու համար նախագահ Բաշար Ասադի` դեպի մայրաքաղաք մուտք գործող հակառակորդներին:
Սիրիացի ընդդիմադիրների վկայությամբ` Սիրիայի տնտեսական մայրաքաղաք Հալեպում շարունակվում են բախումները կառավարական ուժերի և ընդդիմադիրների միջև: Նրանք հայտնում են պաշտպանության նախարարության շենքի, ինչպես նաև ВВС-ի շտաբի վրա զինյալների հարձակման մասին: Բախումների վայրում դաժան հրաձգություն է սկսվել: Կան տասնյակ սպանվածներ ու վիրավորներ:
Reuters գործակալությանը տված հարցազրույցում ընդդիմադիր խմբավորումներից մեկի ղեկավարը հայտարարել է, որ Հալեպում իրենց գործողությունները «ժամանակ շահելու» նպատակ են հետապնդում: «Եթե մենք շարունակենք պահել մեր դիրքերը և հարձակվել, Ասադի ռեժիմը կշարունակի կորուստներ կրել միջազգային, մարզային և տեղական ճակատներում, իսկ ընդդիմադիրների դիրքերը կամրապնդվեն, և դա մեզ վերազինվելու և համալրվելու հնարավորություն կտա»,- ասել է նա:
Նրա խոսքով` իր խմբավորումը Հալեպում ունի 1300 զինյալ, ևս 500-ը` հարևան մարզերում:
Միևնույն ժամանակ Reuters գործակալությունը հղում կատարելով սիրիական Al Khabar լրատվական կայանին, տեղեկացնում է, որ Ազատ բանակի զինյալները ռմբակոծում են Հալեպի հայկական Սուլեյմանիե թաղամասում գտնվող կաթողիկե Ալ Րամ եկեղեցին: Ըստ Facebook-ի հալեպահայերի էջում արված գրառումների, Ալ Րամ եկեղեցին ընդամենը 5 մետր հեռավորության վրա է գտնվում Քաղաքական ապահովության շենքից, որը և ազատբանակայինների թիրախն է: Նախնական տեղեկություններով մարդկային զոհեր չկան:
