Հայտնի հոլիվուդյան դերասան Սիլվեստեր Ստալոնեի որդու՝ Սեյջի մահվան պատճառը եղել է աթերոսկլերոզը, որն էլ հանգեցրել է սրտի կաթվածի: Այս մասին հաղորդում է CNN-ը:
Դատաքննիչ Ֆրեդ Կորալի խոսքով՝ Ստալոնեի ընտանիքին ծանուցել են դիահերձման արդյունքների մասին, լիարժեք հաշվետվությունը պատրաստ կլինի հաջորդ շաբաթ:
Հիշեցնենք, որ 36-ամյա Սեյջ Ստալոնեին մահացած էին գտել Հոլիվուդի իր տանը հուլիսի 13-ին: Նրա մարմնին բռնության հետքեր չէին հայտնաբերվել: Ոստիկանությունը տանը հայտնաբերել էր ցավազրկող դեղամիջոցեր:
Սեյջի մայրը՝ Սաշա Զակը հայտնել էր, որ մահվանից 2 շաբաթ առաջ որդին ատամնաբույժի մոտ էր գնացել, որը 5 ատամների հեռացման բարդ վիրահատություն էր իրականացրել: Նրա խոսքով՝ Սեյջը չէր կարողանում դիմանալ ցավին և դրա դեմ պայքարում էր ցավազրկողներով: Սկզբում կասկածում էին, թե մահը վրա է հասել թմրանյութերի չարաշահումից:
Սեյջը Ստալոնեի ավագ որդին էր: Դերասան էր, ռեժիսոր, կինոպրոդյուսեր: Կինոյում Սեյջը իր դեբյուտն արել է 1990 թվականին՝ նկարահանվելով «Ռոկկի-5» ֆիլմում, որի գլխավոր դերում հանդես էր գալիս իր հայրը՝ Սիլվեստերը:
Վերջին օրերին Ստալոնեի ընտանիքին ևս մեկ ողբերգություն է պատուհասել: Կիրակի 49 տարեկան հասակում թոքերի քաղցկեղից մահացել է հայտնի դերասանի քույրը` Թոնի Էնն Ֆոլիտը:
