ԽՍՀՄ առաջին և միակ նախագահ Միխայիլ Գորբաչովը 1990թ. Լիտվայի անկախությունը ճանաչելու համար պահանջել է լիտվացիներից 21 մլրդ ռուբլի, ինչպես նաև լիտվական Կլայպեդա քաղաքը: Այս մասին հաղորդել է Delfi.lt կայքը` մեջբերելով այն տարիներին ԽՍՀՄ-ում Շվեդիայի գլխավոր հյուպատոս Դագա Սեբաստյանի դիվանագիտական հաղորդագրությունից:
Այդ փաստաթուղթը թվագրված է 1990թ.-ի մարտի 9-ին: Այնտեղ պատմվում է Գորբաչովի հանդիպման մասին Լիտվայի գերագույն խորհրդի նախագահ Ալգիրդաս Բրազաուսկասի հետ: Զրույցի ժամանակ Գորբաչովը համաձայնել է անկախություն տրամադրել Լիտվային, եթե վերջինս 21 մլրդ ռուբլի վճարել ԽՍՀՄ-ին` այնտեղ կառուցված գործարանների համար, ինչպես նաև լիտվական Կլայպեդա քաղաքը միացնել ԽՍՀՄ-ին: Ի պատասխան սրա` Լիտվան Գորբաչովից պահանջել է 500 մլրդ ռուբլի` սովետական օկուպացիայի համար:
Կլայպեդայի հարցը բարձրացվել է այն ժամանակ, երբ Գորբաչովը նաև պահանջել է, որպեսզի վերականգնվի ԽՍՀՄ և Լիտվայի միջև 1939թ. ստորագրված պայմանագիրը, որով Կլայպեդան Լիտվային արդեն չի պատկանել, այլ միացվել է Գերմանիային` Բեռլինի վերջնագրից հետո: Պատերազմից հետո է Կլայպեդան գրավվել սովետական զորքերի կողմից և միացվել Լիտվայի Խորհրդային Սոցիալիստական Հանրապետությանը:
Ինչպես գիտենք Գորբաչովի պահանջները չեն կատարվել, իսկ Լիտվան 1991թ. օգոստոսի «պուտչից» հետո ինքնաբերաբար ստացել է անկախություն` ճանաչվելով աշխարհի շատ երկրների կողմից:
Շվեդական «վիքիլիքսեր» անունը կրող հրապարակումները վերաբերում են այդ երկրի կառավարության կողմից 1989-1991թթ. ԽՍՀՄ-ում շվեդ դիվանագետների գաղտնազերծված փաստաթղթերին: Այս հաղորդագրությունը դրանցից մեկն է:
