Երևանի Կենտրոն և Նորք-Մարաշ վարչական շրջանների դատարանում այսօր մեկնարկեց և միաժամանակ հետաձգվեց Երևանի Հանրապետության հրապարակում կազմակերպված նախընտրական զանգվածային միջոցառման ընթացքում գազով լիցքավորված փուչիկների բռնկման հետևանքով միջոցառման 200-ից ավելի մասնակիցների կողմից տարբեր աստիճանի այրվածքներ ու մարմնական այլ վնասվածքներ ստանալու դեպքի առթիվ հարուցված քրեական գործով դատավարությունը: Դատական նիստը հետաձգվեց գործով մեղադրյալ Սերոբ Բոզոյանի բացակայության պատճառով, որը ըստ դատարանի` թեև պատշաճ կերպով ծանուցվել է, բայց ծանուցագիրը վերադարձել է` նշումով, որ ամբաստանյալը նշված հասցեում չի բնակվում:
Հիշեցնենք, որ այս տարվա մայիսի 4-ին Հանրապետության հրապարակում նախընտրական զանգվածային միջոցառման ընթացքում գազալիցքավորված փուչիկների պայթյունի հետևանքով այրվածքներ էր ստացել և տարբեր բուժհաստատություններ տեղափոխվել 154 անձ:
Այսօր դատարան էին ներկայացել տուժածներից միայն 79-ը, ինչպես նաև 3 վկա:
Այս գործով մեղադրող դատախազ Հակոբ Մարտիրոսյանի միջնորդությամբ դատարանն այսօր 2 շաբաթով հետաձգեց դատավարությունը` հաջորդ նիստին ամբաստանյալի և մնացյալ տուժողների ներկայությունն ապահովելու նպատակով: Դատական հաջորդ նիստը նշանակված է սեպտեմբերի 14-ին:
Նշենք, որ գործի նախաքննության ընթացքում մի շարք փորձաքննությունների՝ դատապայթյունատեխնիկական, դատահրդեհատեխնիկական և քննչական փորձարարության արդյունքների համադրությունը, գործով ձեռք բերված այլ ապացույցների հետ, հիմք էին տվել հանգելու այն եզրակացության, որ մեթան գազով լիցքավորված փուչիկները պայթել են փուչիկների տեղակայման հատվածում առաջացած պայթյունավտանգ խառնուրդի և պայթյունի գործոնների` բարձր ջերմաստիճանի և բաց կրակի ներգործությունից: Քրեական գործն էլ հարուցվել էր Քր. օր.-ի 240-րդ հոդվածի 1-ին մասի հատկանիշներով` «դյուրավառ կամ այրիչ նյութերի պահպանման, հաշվառման, փոխադրման, առաքման կամ օգտագործման կանոնները խախտելը, ինչպես նաև նշված նյութերի ապօրինի փոխադրումը կամ առաքումը»:
Գործով որպես մեղադրյալ ներգրավվել է Երևան քաղաքի բնակիչ Սերոբ Բոզոյանը, որը Երևան քաղաքի Հանրապետության հրապարակում 2012 թ. մայիսի 4-ին կայանալիք զանգվածային միջոցառման կազմակերպիչներից 2012 թ. մայիսի 3-ին ստացել է երկինք բաց թողնելու համար նախատեսված 7000 հատ փուչիկ լիցքավորելու պատվեր:
Դատական տեղեկատվական համակարգից տեղեկանում ենք, որ փուչիկները լիցքավորած անձին` Սերոբ Բոզոյանին, մեղադրանք է առաջադրվել ՀՀ քր. օր.-ի 279-րդ հոդվածի երկրորդ մասով՝ անվտանգության պահանջներին չհամապատասխանող ապրանքներ թողարկելը կամ իրացնելը, ինչն անզգուշությամբ վնաս է պատճառել երկու կամ ավելի անձանց առողջությանը: Վերջինս, ըստ նախաքննության, սպառման համար անվտանգ հելիում գազի փոխարեն փուչիկները լիցքավորել է սեղմված բնական (մեթան) գազով` նախապես իմանալով, որ այրվող գազ հանդիսացող, որպես այլընտրանքային վառելիք տրանսպորտային միջոցների ներքին այրման շարժիչների համար կիրառվող սեղմված բնական (մեթան) գազը օդի հետ շփվելիս վերածվում է պայթյունավտանգ խառնուրդի, որն էլ բաց կրակի դեպքում առաջացնում է պայթյուն:
