Իրանի Իսլամական Հանրապետության մայրաքաղաքում այսօր մեկնարկում է Չմիավորման շարժման 16-րդ գագաթնաժողովը: 2 օրերի ընթացքում Թեհրանը կհյուրընկալի Չմիավորված երկրների առաջնորդներին:
ITAR-TASS-ի փոխանցմամբ` այսօր Իրանում կլինեն 24 նախագահներ, 3 թագավորներ և 80 վարչապետներ ու նախարարներ:
Գագաթնաժողովի հիմնական թեմաներն են Իրանի միջուկային ծրագիրն ու սիրիական ճգնաժամի հաղթահարումը: Նախատեսվում են քննարկումներ` կապված մարդու իրավունքների, իրաքյան, պաղեստինյան, աֆղանական հարցերի հետ:
Գագաթնաժողովի շրջանակում վերջին երկու օրերին անցկացվել են Շարժման անդամ երկրների ԱԳՆ ղեկավարների հանդիպումներ: Իրանի արտգործնախարար Ալի Աքբար Սալեհիի խոսքով` Շարժման մասնակիցները Իրանի նախաձեռնությամբ համաձայնության են եկել սիրիական ճգնաժամի հաղթահարման նպատակով համատեղ ակտիվ գործողություններ սկսելու հարցի շուրջ: Իրանի նախագահ Մահմուդ Ահմադինեժադի խոսքով` այդ հարցը պետք է կարգավորել բացառապես խաղաղ ճանապարհով:
Չնայած Վաշինգտոնի դիմակայությանը` այսօրվա հանդիպմանը մասնակցելու համար Թեհրանում է նաև ՄԱԿ-ի գլխավոր քարտուղար Պան Գի Մունը: Նա ընդգծել է սիրիական հակամարտության կարգավորման գործում Իրանի մասնակցության անհրաժեշտությունը:
«Ես այստեղ եմ, որպեսզի Իրանի իշխանություններին հայտնեմ, որ իրենք կարող են դրական և շատ կարևոր դեր խաղալ միջազգային հանրությունում և Մերձավոր Արևելքում, առաջին հերթին` Սիրիայում առկա խնդիրների կարգավորման գործում»,- ասել է Պան ԳիՄունը:
Հանդիպման նախաշեմին Ահմադինեժադը թույլ է տվել պատվավոր հյուրերին այցելել երկրի միջուկային օբյեկտներ, եթե նրանց մոտ նման ցանկություն առաջանա:
