Կենսամակարդակի որակական հատկանիշներով 2011թ.-ի լավագույն քաղաք է ճանաչվել կանադական Վանկուվերը: Այսպիսի միջազգային վարկանիշ է չորեքշաբթի օրը Լոնդոնում հրապարակել Economist Intelligence Unit ազդեցիկ հետազոտական կենտրոնը:
Վարկանիշային ցուցակում երկրորդ տեղը գրավում է ավստրալիական Մելբուրն քաղաքը, իսկ առաջին եռյակը եզրափակում է Ավստրիայի մայրաքաղաք Վիենան: Դրանից հետո ըստ հերթականության գտնվում են կանադական Տորոնտոն և Կալգարին, Ֆինլիանդիայի մայրաքաղաք Հելսինկին, երեք ավստրալիական քաղաքներ` Սիդնեյը, Փերտը և Ադելաիդան: Առաջին տասնյակը եզրափակում է նորզելանդական Օքկլենդը: Ցուցակի ամենավերջին հորիզոնականում է գտնվում Զիմբաբվեյի մայրաքաղաք Հարարեն:
Քաղաքների վարկանիշը որոշելիս հաշվի է առնվել տնտեսական, սոցիալական, մշակույթային և էկոլոգիական տվյալների լայն տարրապատկեր, որն իր մեջ ներառում է քաղաքային ծառայությունների ընդհանուր կայունությունը, բժշկական ծառայությունների մակարդակը, կրթական համակարգը, տրանսպորտային ենթակառուցվածքները, օդի և խմելու ջրի մաքրության ցուցանիշները, ինչպես նաև զվարճանքների ոլորտի զարգացվածության աստիճանը:
