Վենեսուելայի Ամուայ քաղաքի նավթավերամշակող գործարանում տեղի ունեցած պայթյունի հետևանքով զոհերի թիվը հասել է 41-ի: Ըստ մոտակա Պունտո-Ֆիհո քաղաքի հիվանդանոցի բժշկի` մահացել են այն երկու հիվանդները, որոնց հիվանդանոց էին տեղափոխել ուժեղ այրվածքներով: Եվս 7 տուժածների վիճակը կայուն է, իսկ 9 մարդու ուղարկել են այրվածքաբանական կենտրոն:
Գործարանում պայթյունը տեղի էր ունեցել գազի արտահոսքի պատճառով: Պայթյունի հետևանքով վնասվել են 209 բնակելի շենքեր, այդ թվում՝ Ազգային գվարդիայի մասնաշենքը, որը տեղակայված է գործարանի մոտակայքում: Զոհվածների թվում են 18 գվարդիականներ, իսկ քաղաքացիական զոհերի մեծ մասը այդ մասնաշենքում ապրող նրանց ընտանիքների անդամներն են:
Վենեսուելայի նախագահ Ուգո Չավեսը շաբաթ օրը եռօրյա սուգ էր հայտարարել:
