Իրանի իսլամական հանրապետության մայրաքաղաք Թեհրանում այսօր տեղի է ունենալու Չմիավորման շարժման գագաթաժողովի բացումը: Չմիավորման շարժումն իր մեջ ներառում է 120 զարգացող երկիր:
Ակնկալվում է, որ գագաթաժողովին մասնակցելու են 35 երկրի նախագահներ, կառավարության ղեկավարներ և ավելի քան 80 երկրի ներկայացուցիչներ:
Հյուրերի թվում է լինելու նաև ՄԱԿ գլխավոր քարտուղար Պան Գի Մունը: ԱՎելի վաղ Իսրայելը և ԱՄՆ-ը նրան կոչ էին արել հրաժարվել այդ այցելությունից:
Գագաթաժողովից առաջ Իրանի նախագահ Մահմուդ Ահմադինեժադը կրկին հանդես է եկել Իսրայելի դեմ սպառնալիքներով` անվանելով նրան «քաղցկեղային ուռուցք»: Նախագահը նաև նշել է, որ Իսրայելը տեղ չունի Մերձավոր Արևելքում:
Թեհրանն իր հերթին մտադրություն է հայտնել գագաթաժողովի առիթն օգտագործել չմիավորված երկրների միջև հակաարևմտյան տրամադրվածությունն ամրապնդելու նպատակով:
Նշենք, որ Չմիավորման գագաթաժողովին նախատեսվում է նաև ՀՀ նախագահ Սերժ Սարգսյանի մասնակցությունը:
