Ֆրանսիայի նախագահ Ֆրանսուա Օլանդը հաստատել է, որ Հունաստանը չպետք է լքի եվրոգոտին:
«Իմ կարծիքով` այս հարցը չի քննարկվում, քանի որ Հունաստանը գտնվում է եվրոգոտում և պետք է մնա դրա կազմում, դրա հետ մեկտեղ պետք է ցույց տա իր ծրագրի հիմնավորված լինելը և իր ղեկավարների մինչև վերջ գնալու կամքը»,- ասել է Օլանդը Հունաստանի վարչապետ Անտոնիս Սամարասի հետ հանդիպումից հետո:
Նա նաև հավելել է, որ ինչքան արագ որոշում կայացվի Հունաստանին տրամադրվելիք օգնության հարցում, այնքան լավ կլինի:
Հիշեցնենք, որ օգնության ցուցաբերումը հնարավոր կլինի այն բանից հետո, երբ Եվրոպական հանձնաժողովը, Եվրոպական կենտրոնական բանկը և ԱՄՀ-ը համատեղ զեկույց պատրաստեն Հունաստանի մասին:
Ֆրանսիացի նախագահը նշել է, որ երբ պատրաստ լինի զեկույցը ու հաստատվեն բոլոր պարտավորվածությունները, Եվրոպան պետք է անի այն, ինչ պարտավոր է անել:
«Մենք այս հարցով զբաղվել ենք ավելի քան երկուսուկես տարի, մենք կորցնելու ժամանակ չունենք»,- հավելել է Օլանդը:
«Ազատություն» ռադիոկայանի փոխանցմամբ` Հունաստանի վարչապետը, իր հերթին, նշել է, որ Հունաստանը կկարողանա լուծել բոլոր խնդիրները:
