Իրանի իշխանությունները ՀԱՄԱՍ-ի ղեկավարությանը հրավիրել են մասնակցելու Չմիավորման շարժման գագաթաժողովին, որը տեղի է ունենալու Թեհրանում գալիք շաբաթ: ՀԱՄԱՍ-ի վարչապետը գոհունակությամբ է ընդունել հրավերը:
Պաղեստինի ինքնավարության և ՖԱԹՀ-ի առաջնորդ Մահմուդ Աբբասը նույնպես հրավեր է ստացել Իրանից: Ինքնավարության արտգործնախարար Ռիադ Մալիքին հայտարարել է, որ իր կառավարությունը «պարզաբանումների է սպասում Իրանից»: Նա նաև ընդգծել է, որ Աբբասը չի գնա Թեհրան, եթե այնտեղ լինի ՀԱՄԱՍ-ի վարչապետ Իսմայիլ Հանիյեն:
Թեհրանում տեղի ունենալիք Չմիավորման գագաթաժողովին խոստացել են մասնակցել ավելի քան 100 երկրների պատվիրակություններ, ընդ որում` մոտ 30 երկիր ներկայացված կլինի նախագահի, փոխնախագահի կամ վարչապետի մակարդակով:
Չմիավորման շարժումը ներառում է 120 երկիր, նաև մոտ երկու տասնյակ դիտորդ-պետություններ: Շարժման գագաթաժողովը տեղի է ունենալու օգոստոսի 26-30-ը:
