ԲՀԿ մամլո խոսնակ Տիգրան Ուրիխանյանը խղճում է Հմայակ Հովհաննիսյանին, այդ պատճառով էլ դատի չի տալիս նրան: Այս մասին այսօր լրագրողների հետ հանդիպմանն ասաց Ուրիխանյանը: Նա նշեց, որ չի ցանկանա խոսել մի մարդու մասին, ով ունի հոգեկան, աշխատանքային և այլ խնդիրներ: «Եթե չղճայի, իր ստերի համար դատի կտայի: Բայց խղճում եմ, մեղքում եմ, հարկավոր չէ ընկածին ավելի շատ հարվածել: Կարծում եմ՝ լավ կլինի թեման փակել»,- ասաց նա:
ԲՀԿ-ն դեռևս գաղտի է պահում` նախագահական ընտրություններին հանդես գալո՞ւ է սեփական թեկնածուով, կամ համագործակցելո՞ւ է ընդդիմադիր ուժերի հետ` միասնական թեկնածուի հարցում: «Նախագահական ընտրությունների հետ կապված ասեմ մի նոր բան, իհարկե հումորով, կգա պահը, և մենք այդ մասին կխոսենք»: Նախագահական ընտրությունների նախաշեմին ՀԱԿ-ԲՀԿ համագործակցության մասին նույնպես նա չցանկացավ խոսել: Ըստ Ուրիխանյանի` իրենք հիմա չեն ուզում նախագահական ընտրությունների մասին խոսել` բազմաթիվ հանգամանքներից ելնելով: Թե ինչ հանգամանքներ, նա այդպես էլ չասաց:
ԲՀԿ-ն պատրաստ է և պարբերաբար համագործակցում է այն ուժերի հետո, ովքեր պատրաստ են լուծելու պետական կարևորագույն, ժողովրդին հուզող առաջնային խնդիրներ: «Այնտեղ, որտեղ կա առաջարկ, որը կարող է ապահովել զարգացում պետության համար, բարեկեցություն և առաջընթաց ժողովրդի համար, մենք կարող ենք համագործակցել»,- ասաց ԲՀԿ մամլո խոսնակը` նշելով, սակայն, որ չպետք է իրենց առջև նախապայմաններ դրվեն: «Եթե չկան մեզ պարտադրվող նախապայմաններ, հրամցվող այլ խնդիրներ և սկզբունքային տարակարծություններ, պատրաստ ենք համագործակցել»,- ընդգծեց նա:
ԲՀԿ-ն, ըստ նրա, երկրի համատեղ կառավարման առումով նույնպես իր դիրքորոշումը չի փոփոխել: «ԲՀԿ-ն պատրաստ է ցանկացած պահի ստանձնել պատասխանատվություն երկրի կառավարման գործում, եթե կաշկանդված չլինենք այլ պարտադրանքներով»,- ասաց նա:
