Քիչ առաջ Reuters գործակալությունը հաղորդել է, որ լիբիական Բենղազի քաղաքում, որը լիբիական դիմադրության կենտրոնն է համարվում, ավերվել է օդանավակայանի թռիչքուղին: Գործակալությունն այս տեղեկությունը ստացել է Եգիպտոսի արտաքին գործերի նախարարից:
Եթե տեղեկությունը հաստատվի, ապա կարելի է ասել, որ օտարերկրացիները լուրջ խնդիրների առաջ կարող են կանգնել, քանի որ նրանց տարհանումը շատ կդժվարանա: Մենք արդեն տեղեկացրել էինք, որ Բենղազի քաղաքի մարզադաշտում են հավաքվել հազարավոր թուրքեր, որոնք սպասում էին տարհանման: Քիչ առաջ РИА-Новости գործակալությունը հայտնեց, որ լիբիական իշխանությունները խոչընդոտներ են ստեղծում Ռուսաստաանի քաղաքացիների տարհանման համար` հայտարարելով, թե նրանց կյանքին ոչինչ չի սպառնում, իսկ Լիբիայի օդային տարածքը փակ է:
Ըստ Al-Jazeera-ի՝ երկրի արևմտյան սահմանում նույնպես իրավիճակը լուրջ է, քանի որ լիբիական սահմանապահները կա՛մ թույլ չեն տալիս մարդկանց լքել երկիրը, կա՛մ էլ նրանցից վերցնում են բոլոր իրերը` տեխնիկայից մինչև հագուստ: Հավանաբար, նրանք մտահոգություն ունեն, որ ռեժիմի գործած վայրագությունների ապացույցները երկիրը լքող մարդկանց շնորհիվ կհայտնվեն օտարերկրյա լրատվամիջոցների ձեռքում: